Ramayana | ‘రామాయణ’ ఇంగ్లిష్ వెర్షన్‌లో 25 నిమిషాలు కట్.. ప్రపంచ ప్రీమియర్‌లో ఆసక్తికర విషయం!

Ramayana | భారతీయ ఇతిహాసం ఆధారంగా తెరకెక్కుతున్న భారీ చిత్రం ‘రామాయణ: రైజ్ ఆఫ్ ఎ లెజెండ్’ మరోసారి వార్తల్లో నిలిచింది. ఈ సినిమా ప్రపంచ ప్రీమియర్‌ అమెరికాలోని లాస్ ఏంజెలెస్‌లో ఘనంగా జరిగింది. అకాడమీ మ్యూజియం ఆఫ్ మోషన్ పిక్చర్స్‌లోని డేవిడ్ గెఫెన్ థియేటర్‌లో నిర్వహించిన ప్రత్యేక ప్రదర్శనకు భారీ సంఖ్యలో ప్రేక్షకులు హాజరయ్యారు.

Ramayana | భారతీయ ఇతిహాసం ఆధారంగా తెరకెక్కుతున్న భారీ చిత్రం ‘రామాయణ: రైజ్ ఆఫ్ ఎ లెజెండ్’ మరోసారి వార్తల్లో నిలిచింది. ఈ సినిమా ప్రపంచ ప్రీమియర్‌ అమెరికాలోని లాస్ ఏంజెలెస్‌లో ఘనంగా జరిగింది. అకాడమీ మ్యూజియం ఆఫ్ మోషన్ పిక్చర్స్‌లోని డేవిడ్ గెఫెన్ థియేటర్‌లో నిర్వహించిన ప్రత్యేక ప్రదర్శనకు భారీ సంఖ్యలో ప్రేక్షకులు హాజరయ్యారు. చిత్ర ప్రధాన బృందం కూడా ఈ కార్యక్రమంలో పాల్గొంది. అయితే, ప్రదర్శించిన ఇంగ్లిష్ వెర్షన్ నిడివిపై ఇప్పుడు ఆసక్తికర చర్చ జరుగుతోంది. లాస్ ఏంజెల్స్‌లో ప్రదర్శించిన ఈ సినిమా ఇంగ్లిష్‌లోకి అనువదించిన త్రీడీ వెర్షన్ అని సమాచారం. ఈ వెర్షన్‌ను చూసిన పలువురు ప్రేక్షకులు, అసలు హిందీ వెర్షన్‌తో పోలిస్తే నిడివి తక్కువగా ఉందని పేర్కొన్నట్లు తెలుస్తోంది. హిందీ వెర్షన్ మూడు గంటలకు పైగా ఉంటుండగా, ఇంగ్లిష్ వెర్షన్‌లో సుమారు 25 నిమిషాల నిడివి తగ్గినట్లు ప్రచారం జరుగుతోంది.

అయితే, ఈ మార్పునకు అసలు కారణం ఏమిటన్నది ఇంకా స్పష్టంగా తెలియలేదు. ఇంగ్లిష్ వెర్షన్‌లో కొన్ని పాటలను తొలగించి ఉండవచ్చని ఊహాగానాలు వినిపిస్తున్నాయి. పాటల నిడివి తగ్గించడం వల్లే సినిమా మొత్తం నిడివిలో వ్యత్యాసం వచ్చి ఉండవచ్చని కొందరు భావిస్తున్నారు. కానీ చిత్ర బృందం నుంచి దీనిపై అధికారిక ప్రకటన వెలువడాల్సి ఉంది. దర్శకుడు నితేశ్ తివారీ రూపొందిస్తున్న ఈ చిత్రాన్ని నమిత్ మల్హోత్రా, యశ్ నిర్మిస్తున్నారు. రణ్‌బీర్ కపూర్, యశ్, సాయిపల్లవి ప్రధాన పాత్రల్లో నటిస్తున్నారు. భారతీయ ఇతిహాసమైన రామాయణాన్ని ప్రపంచ ప్రేక్షకులకు పరిచయం చేసేలా భారీ స్థాయిలో ఈ చిత్రాన్ని తెరకెక్కిస్తున్నారు.

ఈ సినిమాకు ఏఆర్ రెహమాన్, హాన్స్ జిమ్మర్ సంగీతాన్ని అందిస్తున్నారు. భారతీయ సంగీత ప్రతిభతో పాటు అంతర్జాతీయ స్థాయి సంగీత దర్శకుడి భాగస్వామ్యం కూడా ఈ ప్రాజెక్టుపై అంచనాలను పెంచుతోంది. ‘రామాయణ: రైజ్ ఆఫ్ ఎ లెజెండ్’ తొలి భాగాన్ని 2026 నవంబర్ 5న విడుదల చేయడానికి చిత్ర బృందం సిద్ధమవుతోంది. ప్రపంచ ప్రీమియర్‌ పూర్తవడంతో సినిమా గురించి మరిన్ని వివరాలు బయటకు వచ్చే అవకాశం ఉంది. ముఖ్యంగా హిందీ, ఇంగ్లిష్ వెర్షన్ల నిడివిలో తేడా ఎందుకు వచ్చిందనే అంశంపై చిత్ర బృందం స్పష్టత ఇస్తుందా లేదా అన్నది ఆసక్తికరంగా మారింది.