Cinema News | తండ్రీకొడుకుల అనుబంధం.. రామం రాఘవం

‘నేను నటించిన చిత్రాలకు పనిచేసిన దర్శకుల నుండి నేర్చుకున్న విషయాల ఆధారంగా ఈ సినిమాకు దర్శకత్వం వహించాను. ఇప్పటివరకూ వంద చిత్రాల్లో నటించా.

Cinema News | ‘నేను నటించిన చిత్రాలకు పనిచేసిన దర్శకుల నుండి నేర్చుకున్న విషయాల ఆధారంగా ఈ సినిమాకు దర్శకత్వం వహించాను. ఇప్పటివరకూ వంద చిత్రాల్లో నటించా. ఆ సినిమాల దర్శకులందరూ నాకు గురువులే. వారు నేర్పిన పాఠాలతోనే దర్శకుడిగా మారాను.

సముద్రఖని అన్న లేకుంటే ఈ సినిమా పూర్తయ్యేదికాదు, నేను దర్శకుడిని అయ్యేవాడ్ని కాదు. ప్రతి ఒక్కరూ నాన్నతో కలిసి చూడాల్సిన సినిమా ఇది’ అని ధనరాజ్‌ అన్నారు. ఆయన దర్శకుడిగా మారి తెరకెక్కిస్తున్న ద్విభాషా చిత్రం ‘రామం రాఘవం’.

సముద్ర ఖని ప్రధాన పాత్ర పోషిస్తున్న ఈ చిత్రానికి పృథ్వీ పోలవరపు నిర్మాత. ఈ సినిమా టీజర్‌ విడుదల కార్యక్రమం ఘనంగా జరిగింది. దర్శకుడు బాలా, పాండిరాజ్‌, నటులు బాబీ సింహా, తంబి రామయ్య, హాస్యనటుడు సూరి, దీపక్‌, హరీశ్‌ ఈ కార్యక్రమంలో పాల్గొని చిత్ర యూనిట్‌కి శుభాకాంక్షలు అందించారు.

తండ్రీకొడుకుల అనుబంధం గురించి చెప్పే సినిమా ఇదని, సముద్రఖని లేకపోతే ఈ సినిమా లేదని నిర్మాత తెలిపారు. ధనరాజ్‌పై ఉన్న నమ్మకంతో ఈ కథను తననే డైరెక్ట్‌ చేయమని చెప్పానని, తను కచ్చితంగా పెద్ద విజయాన్ని అందుకుంటాడని సముద్రఖని నమ్మకం వెలిబుచ్చారు.