Visit:
Ram Pothineni | టాలీవుడ్లో స్టార్ హీరోలపై అభిమానుల ప్రేమ గురించి తరచూ కథనాలు వినిపిస్తుంటాయి. అయితే కొన్నిసార్లు అభిమానుల కోసం హీరోలు చేసే చిన్న పనులే వారిని నిజ జీవితంలో కూడా ప్రత్యేకంగా నిలబెడతాయి. తాజాగా హీరో రామ్ పోతినేని చేసిన ఓ పని ఇప్పుడు సోషల్ మీడియాలో విపరీతంగా వైరల్ అవుతోంది. తన ఎనర్జిటిక్ స్క్రీన్ ప్రెజెన్స్, మాస్ పెర్ఫార్మెన్స్లతో ప్రేక్షకులను అలరించే రామ్, ఈసారి తన పెద్ద మనసుతో అందరి ప్రశంసలు అందుకుంటున్నారు. గత 18 ఏళ్లుగా అరుదైన నరాల సంబంధిత వ్యాధి ఫ్రెడ్రిచ్ అటాక్సియాతో పోరాడుతున్న ఓ వీరాభిమాని కోరికను ఆయన స్వయంగా నెరవేర్చడం ఇప్పుడు అభిమానులను భావోద్వేగానికి గురి చేస్తోంది.
తన అభిమాన హీరోను ఒక్కసారైనా కలవాలని ఆ యువతి చాలా కాలంగా కోరుకుంటున్నట్లు తెలుస్తోంది. ఆ విషయం తెలుసుకున్న రామ్ ఎలాంటి ప్రచారం లేకుండా నేరుగా ఆమె ఇంటికే వెళ్లి పరామర్శించారు. కొద్దిసేపు ఆమెతో మాట్లాడి ధైర్యం చెప్పడమే కాకుండా, కుటుంబ సభ్యులతో కూడా సమయం గడిపినట్లు సమాచారం. ప్రస్తుతం దీనికి సంబంధించిన ఫొటోలు, వీడియోలు సోషల్ మీడియాలో వైరల్ అవుతున్నాయి. అభిమానులు, నెటిజన్లు “రియల్ హీరో అంటే ఇలానే ఉండాలి” అంటూ రామ్పై ప్రశంసలు కురిపిస్తున్నారు.
ఫ్రెడ్రిచ్ అటాక్సియా అనేది అరుదుగా కనిపించే జన్యుపరమైన నరాల బలహీనత వ్యాధి. ఈ వ్యాధి కారణంగా శరీర కదలికల సమన్వయం క్రమంగా దెబ్బతింటుంది. ముఖ్యంగా మెదడు, వెన్నుపాము, నరాల వ్యవస్థపై ప్రభావం చూపుతుంది. దీనివల్ల నడవడంలో సమస్యలు, చేతులు కాళ్ల బలహీనత, మాట్లాడటంలో ఇబ్బందులు వంటి లక్షణాలు కనిపించే అవకాశం ఉంటుంది. వ్యాధి తీవ్రత పెరిగే కొద్దీ రోజువారీ జీవితం కూడా కష్టతరమవుతుంది.ఇలాంటి పరిస్థితుల్లో కూడా తన అభిమాన హీరోను కలవాలనే ఆ యువతి కోరికను తెలుసుకున్న రామ్ ఎంతో ఆప్యాయంగా స్పందించడం అభిమానులను మరింత ఆకట్టుకుంది. ఆమెతో ఫొటోలు దిగడం, చిరునవ్వుతో మాట్లాడడం వంటి దృశ్యాలు ఇప్పుడు సోషల్ మీడియాలో ప్రత్యేక చర్చకు దారి తీశాయి.
ఇక రామ్ కెరీర్ విషయానికి వస్తే, ప్రస్తుతం ఆయన తన 23వ ప్రాజెక్ట్పై దృష్టి సారించారు. #RAPO23 పేరుతో రూపొందుతున్న ఈ చిత్రం “ది స్టోరీ ఆఫ్ ఎ లోన్ వోల్ఫ్” అనే ట్యాగ్లైన్తో స్టైలిష్ సైకలాజికల్ యాక్షన్ థ్రిల్లర్గా తెరకెక్కుతోంది. ఈ ప్రాజెక్ట్పై ఇప్పటికే సినీ వర్గాల్లో ఆసక్తికర చర్చ మొదలైంది. జూన్ నుంచి రెగ్యులర్ షూటింగ్ ప్రారంభం కానుందని సమాచారం.
View this post on Instagram
