Likitha Murthy | అక్క వల్లే ఏడ్వడం నేర్చుకున్నా.. రాజేశ్వరి విలాస్‌ ఫేమ్‌ లిఖితా మూర్తి ఇంట్రెస్టింగ్‌ కామెంట్స్‌

Likitha Murthy | డాక్టర్‌ కాబోయి.. యాక్టర్‌ అయ్యానని చెప్పేవాళ్లు చాలామందే ఉంటారు. ఈ అమ్మాయి మాత్రం ‘నేను నటినంటే మాత్రం ఇప్పటికీ నమ్మబుద్ధి కావడం లేదు’ అంటున్నది. ‘బంగారు పంజరం’, ‘రాఖీ పౌర్ణమి’ తదితర సీరియల్స్‌తో తెలుగు ప్రేక్షకులకు దగ్గరైన లిఖితా మూర్తి..

Likitha Murthy |  డాక్టర్‌ కాబోయి.. యాక్టర్‌ అయ్యానని చెప్పేవాళ్లు చాలామందే ఉంటారు. ఈ అమ్మాయి మాత్రం ‘నేను నటినంటే మాత్రం ఇప్పటికీ నమ్మబుద్ధి కావడం లేదు’ అంటున్నది. ‘బంగారు పంజరం’, ‘రాఖీ పౌర్ణమి’ తదితర సీరియల్స్‌తో తెలుగు ప్రేక్షకులకు దగ్గరైన లిఖితా మూర్తి.. ‘రాజేశ్వరి విలాస్‌ కాఫీ క్లబ్‌’తో జీ తెలుగు ఛానెల్‌లో సందడి చేస్తున్నది. ఆ ముచ్చట్లు మీకోసం..

లిఖితా మూర్తి అంటే నన్ను గుర్తు పట్టేవాళ్లు తక్కువే. రాజేశ్వరి అనగానే ఠక్కున గుర్తొస్తాను. ఇదంతా జీ తెలుగులో వస్తున్న ‘రాజేశ్వరీ విలాస్‌ కాఫీ క్లబ్‌’ మహిమ. నా విషయానికొస్తే.. మాది బెంగళూరు. ప్రస్తుతం ఎమ్‌కామ్‌ మాస్టర్స్‌ చదువుతున్నా. ఎప్పటికప్పుడు సిలబస్‌ పూర్తి చేసుకుంటూ.. షూటింగ్‌కు వెళ్లాలంటే కష్టంగానే ఉంది. అయినా, పట్టుదలగా బ్యాలెన్స్‌ చేసుకుంటున్నా. మార్కులు ఎనభై శాతానికి తగ్గడం లేదు. ఈ రంగంలోకి వస్తానని కలలో కూడా అనుకోలేదు. మా అక్క కల్పితామూర్తి కూడా నాలా సీరియల్‌ ఆర్టిస్టే. ఆమె డేట్స్‌ కోసం వచ్చిన నిర్మాతలు నన్ను చూసి ‘చక్కగా ఉన్నావ్‌. సీరియల్స్‌లో, సినిమాల్లో ట్రై చేయొచ్చు కదా’ అని సలహా ఇచ్చేవారు. దీంతో ఆడిషన్స్‌కు వెళ్లాను. ‘బంగారు పంజరం’ సీరియల్‌కు ఎంపికయ్యాను. అలా నా యాక్టింగ్‌ కెరీర్‌ స్టార్ట్‌ అయింది.

అమ్మ, నాన్న, అక్క నాకు చాలా మద్దతు ఇస్తారు. ధైర్యం నూరిపోస్తారు. అక్క దగ్గరే యాక్టింగ్‌ నేర్చుకున్నా. మిగతా ఎమోషన్స్‌ ఫర్వాలేదు కానీ, ఏడుపు నటించడం.. ఓ పట్టాన వచ్చేదికాదు. మధ్యలో ఫక్కున నవ్వేసేదాన్ని. నన్ను ఏడిపించడానికి అక్క చేయని ప్రయత్నాలు లేవు. అప్పుడే, తను ఓ చిట్కా చెప్పింది. అదో పరమ రహస్యం. నాతో డెమో షూట్‌ చేసిన మీర్‌ సర్‌ కూడా యాక్టింగ్‌లో మెలకువలు బోధించారు. ‘బంగారు పంజరం’, ‘రాఖీ పూర్ణిమ’ సీరియల్స్‌ దర్శకుడు రాము సార్‌ పాఠాలు నన్ను పూర్తి నటిగా మలిచాయి. ‘రాజేశ్వరి విలాస్‌..’ ప్రొడ్యూసర్‌ లంబోదర్‌ సర్‌.. అన్నయ్య లేని లోటు తీర్చారు.

ఇదే నా సలహా

పరిశ్రమలోకి రావాలనుకునే వారికి నా సలహా ఒకటే. ప్రోత్సాహంలేదనో, అవకాశాలు రావడంలేదనో నీరుగారి పోవద్దు. మనం గెలిచినరోజు ప్రపంచమంతా మన వెనకాలే నిలుస్తుంది. ఈ విషయం గుర్తు పెట్టుకొని ముందుకు వెళ్లండి చాలు. నేనూ ఇదే సూత్రం ఫాలో అవుతున్నా.

– ప్రవీణ్‌ కుమార్‌ సుంకరి