Radhika Apte | టాలీవుడ్ కథలపై రాధికా ఆప్టే సంచలన వ్యాఖ్యలు.. ‘లెజెండ్’ సినిమాను ఉద్దేశించేనా, నెటిజన్ల ఘాటు కౌంటర్లు!

Radhika Apte | బాలీవుడ్ నటి రాధికా ఆప్టే మరోసారి తన వ్యాఖ్యలతో వార్తల్లో నిలిచారు. సహజమైన నటన, వైవిధ్యమైన పాత్రలతో జాతీయ స్థాయిలో గుర్తింపు తెచ్చుకున్న ఆమె.. హిందీతో పాటు తెలుగు, తమిళ సినిమాల్లోనూ నటించారు. అయితే తాజాగా తెలుగు సినిమాల్లో తనకు ఎదురైన అనుభవాల గురించి ఆమె చేసిన వ్యాఖ్యలు టాలీవుడ్‌లో చర్చకు దారితీశాయి

Radhika Apte | బాలీవుడ్ నటి రాధికా ఆప్టే మరోసారి తన వ్యాఖ్యలతో వార్తల్లో నిలిచారు. సహజమైన నటన, వైవిధ్యమైన పాత్రలతో జాతీయ స్థాయిలో గుర్తింపు తెచ్చుకున్న ఆమె.. హిందీతో పాటు తెలుగు, తమిళ సినిమాల్లోనూ నటించారు. అయితే తాజాగా తెలుగు సినిమాల్లో తనకు ఎదురైన అనుభవాల గురించి ఆమె చేసిన వ్యాఖ్యలు టాలీవుడ్‌లో చర్చకు దారితీశాయి. ముఖ్యంగా ఇక్కడి కథాంశాలు, కుటుంబ సంబంధాల నేపథ్యం గురించి ఆమె మాట్లాడిన తీరు సోషల్ మీడియాలో వైరల్ అవుతోంది. మహానటి కీర్తి సురేష్‌తో కలిసి రాధికా ఆప్టే నటించిన క్రైమ్ థ్రిల్లర్ వెబ్‌సిరీస్ ‘అక్కా’ ప్రస్తుతం ఓటీటీలో అందుబాటులో ఉంది. ఈ సిరీస్ ప్రచార కార్యక్రమాల్లో భాగంగా ఓ ఇంటర్వ్యూలో పాల్గొన్న ఆమె తన గత సినిమా అనుభవాలను గుర్తుచేసుకున్నారు.

తెలుగులో తాను నటించిన ఓ సినిమాలో తనకంటే చాలా పెద్ద వయసున్న నటుడితో రొమాన్స్ చేయాల్సి వచ్చిందని రాధికా ఆప్టే తెలిపారు. అంతేకాకుండా కథలో సొంత మేనబావను పెళ్లి చేసుకునే పరిస్థితి ఉంటుందని, సినిమా మధ్యలోనే తన పాత్రను చంపేశారని అసంతృప్తి వ్యక్తం చేశారు. ఆమె సినిమా పేరు నేరుగా చెప్పనప్పటికీ, ఈ వ్యాఖ్యలు నందమూరి బాలకృష్ణ హీరోగా బోయపాటి శ్రీను దర్శకత్వంలో తెరకెక్కిన ‘లెజెండ్’ సినిమాను ఉద్దేశించినవేనని పలువురు భావిస్తున్నారు. 2014లో విడుదలైన ఈ చిత్రంలో రాధికా ఆప్టే బాలకృష్ణకు మరదలి పాత్రలో కనిపించారు. కథలోని ఫ్లాష్‌బ్యాక్‌లో ఆమె పాత్ర హత్యకు గురవుతుంది. దీంతో ఆమె వ్యాఖ్యలు ‘లెజెండ్’ సినిమాకు సంబంధించినవేననే చర్చ మొదలైంది.

రాధికా ఆప్టే వ్యాఖ్యలు బయటకు రావడంతో సోషల్ మీడియాలో భిన్నాభిప్రాయాలు వ్యక్తమవుతున్నాయి. కొందరు ఆమె అభిప్రాయాన్ని సమర్థిస్తుండగా, మరికొందరు మాత్రం విమర్శలు చేస్తున్నారు. కథ నచ్చకపోతే సినిమా అంగీకరించాల్సిన అవసరం ఏముందని ప్రశ్నిస్తున్నారు. సినిమా ఒప్పుకునే ముందు కథ, పాత్ర, హీరో గురించి వివరాలు తెలుసుకునే అవకాశం ఉంటుందని గుర్తుచేస్తున్నారు. మరోవైపు దక్షిణ భారతదేశంలోని కొన్ని ప్రాంతాల్లో మేనరికపు వివాహాలు సంప్రదాయంగా ఉన్నాయని, అలాంటి కుటుంబ నేపథ్యాలను కథల్లో చూపించడం స్థానిక సంస్కృతిలో భాగమని కొందరు నెటిజన్లు అభిప్రాయపడుతున్నారు. ఒక ప్రాంతీయ సినిమా గురించి మాట్లాడేటప్పుడు అక్కడి సంప్రదాయాలు, కథా నేపథ్యాలను కూడా పరిగణనలోకి తీసుకోవాలని సూచిస్తున్నారు. అయితే సంప్రదాయాల పేరుతో సినిమాల్లో చూపించే ప్రతి అంశాన్ని సమర్థించాల్సిన అవసరం లేదని మరికొందరు అభిప్రాయపడుతున్నారు. పాత్రల ఎంపిక, కథలో మహిళలకు ఇచ్చే ప్రాధాన్యతపై నటీమణులు తమ అభిప్రాయాలను వెల్లడించడం సహజమేనని అంటున్నారు.