‘తమిళ నిర్మాత సతీశ్తో అనుకోకుండా ఏర్పడ్డ పరిచయం నన్ను నిర్మాతను చేసింది. ఆయన తమిళంలో నిర్మించిన ‘రంగోలి’ సినిమాను నాకోసం స్పెషల్గా స్క్రీనింగ్ వేశారు. ఆ తర్వాత సినిమా ప్రీరిలీజ్ వేడుకకు పిలిచి, ‘రంగోలీ’ సినిమాకు తెలుగు నిర్మాతగా నన్ను సభాముఖంగా పరిచయం చేశారు. నాక్కూడా సినిమా అద్భుతంగా నచ్చడంతో ఆ సినిమా ‘సత్య’గా మీ ముందుకు తెస్తున్నాను. ఓ విధంగా ఇది అనుకోని మలుపు’ అని నిర్మాత శివ మల్లాల అన్నారు.
హమరేశ్, ప్రార్థన జంటగా, వాలి మోహన్దాస్ దర్శకత్వంలో తమిళంలో రూపొందిన ‘రంగోలి’ సినిమాను ‘సత్య’ పేరుతో తెలుగు ప్రేక్షకులకు అందిస్తున్నారు శివ మల్లాల. శుక్రవారం సినిమా విడుదల కానుంది. ఈ సందర్భంగా ఆయన విలేకరులతో ముచ్చటించారు. ‘తెలుగు సినిమానే చూస్తున్న అనుభూతి కలిగేంత పర్ఫెక్ట్గా డబ్బింగ్ చేశాం. ఏ విషయంలోనూ రాజీ పడలేదు.
దర్శకుడు వాలి మోహన్దాస్ మంచి ప్రతిభావంతుడైన దర్శకుడు. ఈ సినిమాతో తెలుగు ప్రేక్షకులకు కూడా చేరువ అవుతాడు. సీడెడ్లో 28 థియేటర్లు విడుదల చేస్తున్నాం. పీవీఆర్, ఐనాక్స్, సినిమాక్స్ తదితర థియేటర్లలో కూడా భారీగా విడుదలకు ప్లాన్ చేస్తున్నాం’ అని తెలిపారు. టీనేజ్ లవ్, తండ్రీకొడుకుల భావోద్వేగాలు ఈ సినిమాకు హైలైట్గా నిలుస్తాయని, ఒక జీవితాన్ని చూస్తున్న అనుభూతిని కలిగించే సినిమా ఇదని శివ తెలిపారు.