అధర్మాన్ని అణిచి వేయగా..

ప్రభాస్‌ కథానాయకుడిగా నాగ్‌అశ్విన్‌ దర్శకత్వంలో తెరకెక్కిన ‘కల్కి 2898’ చిత్రం ఈ నెల 27న ప్రపంచవ్యాప్తంగా ప్రేక్షకుల ముందుకురానున్న విషయం తెలిసిందే.

ప్రభాస్‌ కథానాయకుడిగా నాగ్‌అశ్విన్‌ దర్శకత్వంలో తెరకెక్కిన ‘కల్కి 2898’ చిత్రం ఈ నెల 27న ప్రపంచవ్యాప్తంగా ప్రేక్షకుల ముందుకురానున్న విషయం తెలిసిందే. ఈ నేపథ్యంలో మంగళవారం ‘థీమ్‌ ఆఫ్‌ కల్కి’ పేరుతో లిరికల్‌ వీడియోను విడుదల చేశారు. సంతోష్‌ నారాయణ్‌ స్వరపరచిన ఈ గీతాన్ని చంద్రబోస్‌ రచించారు. కాలభైరవ ఆలపించారు.

‘కల్కి’ చిత్ర సారాంశాన్ని ఆవిష్కరిస్తూ ఈ పాట అర్థవంతంగా సాగింది. ఇటీవల ఈ గీతాన్ని మధురలో ఆవిష్కరించారు. ‘అధర్మాన్ని అణిచేయగా యుగయుగాన జగములోన పరిపరి విధాల్లోన విభవించే విక్రమ విరాట్‌రూపమిదే.. స్వధర్మాన్ని పరిరక్షించగా.. సమస్తాన్ని ప్రక్షాళించగా..సముద్భవించే అవతారమిదే..’ అంటూ ఈ పాట కృష్ణుడి శక్తియుక్తుల్ని ఆవిష్కరిస్తూ సాగింది. అమితాబ్‌ బచ్చన్‌, కమల్‌హాసన్‌, దీపికా పడుకోన్‌, దిశాపటానీ కీలక పాత్రల్ని పోషించిన ఈ చిత్రాన్ని వైజయంతీ మూవీస్‌ పతాకంపై అశ్వనీదత్‌ అత్యంత ప్రతిష్టాత్మకంగా నిర్మించారు. వరల్డ్‌వైడ్‌గా భారీ స్థాయిలో విడుదలకు సిద్ధమవుతున్నది.