వరుస సినిమాలతో మరో ఏడాది వరకు అగ్ర హీరో ప్రభాస్ కాల్షీట్స్ ఖాళీగా లేనట్లే కనిపిస్తున్నది. ఇటీవలే ‘ఆదిపురుష్’ చిత్రంతో ప్రేక్షకుల ముందుకొచ్చిన ఆయన ప్రస్తుతం ‘ప్రాజెక్ట్-కె’ ‘సలార్’తో పాటు మారుతి దర్శకత్వంలో రూపొందిస్తున్న సినిమా షూటింగ్స్లో పాల్గొంటు బిజీగా ఉన్నారు. మారుతి దర్శకత్వంలో ప్రభాస్ నటిస్తున్న చిత్రాన్ని హారర్ కామెడీ థ్రిల్లర్గా తెరకెక్కిస్తున్నారు. ప్రభాస్ యాక్షన్ ఇమేజ్ను ఎలివేట్ చేస్తూనే తనదైన శైలి వినోదాత్మక అంశాలతో దర్శకుడు మారుతి ఈ చిత్రాన్ని రూపొందిస్తున్నారని చెబుతున్నారు. ఈ సినిమాకు ‘రాజా డీలక్స్’ అనే టైటిల్ను పెట్టబోతున్నట్లు గతంలో వార్తలొచ్చాయి. తాజా సమాచారం ప్రకారం ఈ చిత్రానికి ‘రాయల్’ ‘అంబాసిడర్’ అనే టైటిల్స్ను పరిశీలిస్తున్నట్లు తెలిసింది. ఇందులో ‘రాయల్’ అనే టైటిల్ వైపే చిత్ర బృందం ఎక్కువగా మొగ్గు చూపుతున్నదని సమాచారం. అయితే ఈ విషయంలో చిత్ర నిర్మాతల నుంచి అధికారిక ప్రకటన రావాల్సి ఉంది. ప్రభాస్ కెరీర్లో ఇప్పటివరకు హారర్ కామెడీ జోనర్ను టచ్ చేయకపోవడంతో అభిమానులు ఈ సినిమా కోసం ఆసక్తిగా ఎదురుచూస్తున్నారు.