కొచ్చి: కేరళ రాష్ట్రానికి చెందిన ప్రముఖ నటి చిత్ర (56) గుండెపోటుతో ఈ ఉదయం కన్నుమూశారు. కేరళలోని ఆమె స్వగ్రామమైన సాలిగ్రామంలో ఆమె తుదిశ్వాస విడిచారు. చిత్ర భర్త, ఒక కుమార్తె ఉన్నారు. ఈ రోజే ఆమె అంత్యక్రియలు పూర్తిచేయనున్నట్లు కుటుంబసభ్యులు తెలిపారు. కాగా చిత్ర తన సొంత పేరు కంటే నల్లెన్నై (జింజెలీ ఆయిల్ (నువ్వుల నూనె)) అనే పేరుతోనే ఎక్కువగా పాపులర్ అయ్యారు.
ఎందుకంటే ఆమె అప్పట్లో కేరళలో టాప్ బ్రాండ్ అయిన నల్లెన్నై అనే నువ్వుల నూనెకు సబంధించిన వాణిజ్య ప్రకటనలో నటించారు. అప్పటి నుంచి ఆమె పేరు నల్లెన్నైగా మారిపోయింది. కొచ్చిలో జన్మించిన చిత్ర 1990ల్లో తమిళ చిత్రసీమలో స్టార్గా ఎదిగింది. రజినీకాంత్, శరత్కుమార్, ప్రభు లాంటి అగ్ర హీరోల సరసన ఆమె నటించారు. 1975లో ప్రముఖ దర్శకుడు బాలచందర్ చిత్రను బాలనటిగా సినీ పరిశ్రమకు పరిచయం చేశారు.
అ తర్వాత తన సమకాలికులైన కమల్హాసన్, శ్రీవిద్యలతోపాటు చిత్ర కూడా పాపులర్ నటిగా ఎదిగారు. ఆమె మలయాళంతోపాటు తమిళ, తెలుగు, కన్నడ భాషల్లో కూడా నటించారు. కొన్ని టీవీ సీరియళ్లలో కూడా చిత్రకు మంచి గుర్తింపు లభించింది.