Visit:
ప్రేమ, జ్ఞాపకాలు, జీవన పోరాటం నేపథ్యంలో తెరకెక్కుతున్న నాస్టాల్జిక్ ఎమోషనల్ డ్రామా ‘సాహా’. ‘లైఫ్ ఆఫ్ సంజు’ అనేది ఉపశీర్షిక. శివకుమార్ కాసారం హీరోగా నటిస్తున్న ఈ చిత్రంలో శ్వేత లక్ష్మణ్, వ్రజనా పాండ్యా కీలక పాత్రధారులు. నిశాంత్ దోటి దర్శకుడు. తేజేశ్వర్ వేల్పుచర్ల నిర్మాత. ప్రమోషన్స్లో భాగంగా ‘కాలాన్నే తిరగేసి..’ అంటూ సాగే ఈ సినిమాలోని తొలి పాటను మేకర్స్ విడుదల చేశారు.
‘ఎమోషన్ ఆఫ్ సాహా’గా ఈ పాటను మేకర్స్ పరిచయం చేశారు. పూర్ణాచారి రాసిన ఈ పాటను శేఖర్చంద్ర స్వరపరచగా, అనురాగ్ కులకర్ణి ఆలపించారు. ఈ సాంగ్ లాంచ్ ఈవెంట్ హైదరాబాద్లో జరిగింది. అతిథిగా విచ్చేసిన హీరో కిరణ్ అబ్బవరం ఈ పాటను ఆవిష్కరించి, చిత్రబృందానికి శుభాకాంక్షలు అందించారు. ఇది చాలాకాలం గుర్తుండే సినిమా అని దర్శకుడు నిశాంత్ దోటి తెలిపారు. ఈ సినిమా విజయంపై హీరో శివకుమార్ నమ్మకం వెలిబుచ్చారు. మరో అతిథి మధుర శ్రీధర్ కూడా మాట్లాడారు. ఈ చిత్రానికి కెమెరా: కరుణాకర్.కె.
