Meera Rajput | స్టార్ హ‌జ్బెండ్ అని ఎవ‌రూ అన‌రు.. మ‌రి స్టార్ వైఫ్ అన‌డం దేనికి? : మీరా రాజ్‌పుత్

జనిసె సెక్విరా మొద‌టి ఎపిసోడ్‌లో స్టార్ వైఫ్ ప‌దాన్ని నిషేధించాన్న మీరా

Meera Rajput : సినిమా హీరోల భార్య‌లు, పిల్ల‌లను త‌ర‌చూ స్టార్ వైఫ్, స్టార్ కిడ్ అని పిలుస్తుంటారు. మీడియాలో వాళ్ల గురించి చెప్పిన ప్ర‌తిసారి స్టార్ భార్య‌, స్టార్ కొడుకు, స్టార్ కూతురు అంటూ సంబోధిస్తుంటారు. బాలీవుడ్‌, టాలీవుడ్ అని కాదు.. అన్ని సినిమా ఇండ‌స్ట్రీల్లోనూ ఈ మాట వినిపిస్తుంది. అలా పిలిపించుకోవ‌డం అంద‌రికి న‌చ్చ‌దు. త‌న‌ను స్టార్ వైఫ్ అని పిలవ‌డంపై మీరా రాజ్‌పుత్ తాజాగా స్పందించింది. సోష‌ల్‌మీడియా స్టార్ జనిసె సెక్విరా మొద‌టి ఎపిసోడ్‌లో ఆమె మాట్లాడుతూ.. ‘స్టార్ హ‌జ్బెండ్ అని ఎవ‌రూ అన‌రు. మ‌రి స్టార్ వైఫ్ అని ఎందుకు అంటారో నాకు అర్థం కాదు అని మీరా అంది. స్టార్ భార్య అనే ప‌దాన్ని నిషేధించాలి. ఎందుకంటే.. హీరోల పిల్ల‌ల‌కు స్టార్ కిడ్ అనడం అంద‌రికి న‌చ్చ‌దు. పైగా దానివ‌ల్ల వాళ్లపై నెపోటిజం ఆరోప‌ణ‌లు వ‌స్తున్నాయి. అయినా కూడా ఇప్ప‌టికీ స్టార్ కిడ్ అనే మాట వినిపిస్తూనే ఉంది. స్టార్ హీరోయిన్ లేదా సెల‌బ్రిటీని పెళ్లి చేసుకున్న వ్య‌క్తిని ఎవ‌రు కూడా స్టార్ హ‌జ్బెండ్ అని అన‌రు.  ఆడ‌వాళ్ల‌ను మాత్ర‌మే స్టార్ వైఫ్ అని ఎందుకు పిలుస్తారు?’ అని మీరా ప్ర‌శ్నించింది.

యూట్యూబ‌ర్ అయిన మీరా రాజ్‌పుత్, బాలీవుడ్ హీరో షాహిద్ క‌పూర్ భార్య‌. వీళ్లిద్ద‌రూ 2015లో వివాహం చేసుకున్నారు. వీళ్ల‌కు ఇద్ద‌రు పిల్ల‌లు. పెళ్లి త‌ర్వాత నుంచి ఆమెను అంద‌రూ స్టార్ వైఫ్ అనడం మొద‌లుపెట్టారు. మీరా యూట్యూబ్‌లో అందం, ఆరోగ్యం గురించి పోస్ట్‌లు పెడుతుంటుంది. ఈమెకు ఇన్‌స్టాగ్రామ్‌లో 40 లక్ష‌ల మంది ఫాలోవ‌ర్స్ ఉన్నారు.