హీరో నాని సోదరి దీప్తి ‘మీట్ క్యూట్’ చిత్రంతో దర్శకురాలిగా అరంగేట్రం చేస్తున్నది. ఐదు విభిన్న కథల ఆంథాలజీగా రూపొందిన ఈ సిరీస్లో సత్యరాజ్, ఆదా శర్మ, రోహిణి, ఆకాంక్ష సింగ్, శివ కందుకూరి తదితరులు ప్రధాన పాత్రల్లో నటించారు. వాల్ పోస్టర్ సినిమా పతాకంపై నాని నిర్మించారు. ఈ నెల 25 నుంచి ఈ వెబ్ సిరీస్ సోని లివ్ ఓటీటీలో ప్రీమియర్ కానుంది. తాజా ఇంటర్వ్యూలో ఈ వెబ్ సిరీస్ విశేషాలు తెలిపారు నాని. ఆయన మాట్లాడుతూ…‘నా సోదరి దీప్తి రెండు కథలు రాసి నాకు వినిపించింది. నాకు బాగా నచ్చి ఇలాంటి కథలు మరో మూడు రాయి, ఐదింటినీ కలిపి సిరీస్లా నేను ప్రొడ్యూస్ చేస్తాను అని చెప్పాను. అలా ఈ ప్రాజెక్ట్ మొదలైంది. ఇందులో ఎక్కడా డ్రామా ఉండదు. ప్రతి పాత్ర, సన్నివేశం సహజంగా సాగుతుంటుంది.
ఈ క్యారెక్టర్స్ ఎలా ముగుస్తాయి అనే ఆసక్తి నాలో కలిగింది. నా సిస్టర్ అనే కాదు వేరే ఎవరు ఈ స్క్రిప్ట్ పంపినా నేను నిర్మించేవాడిని. నా సోదరి దీప్తి దర్శకురాలు కాబట్టి నేను ఇందులో అతిథి పాత్రలో నటిస్తానని అందరూ అంచనా వేస్తారు కానీ నాకు సరిపోయే క్యారెక్టర్ ఈ కథలో లేదు’ అని చెప్పారు. దర్శకురాలు దీప్తి మాట్లాడుతూ…‘నిజ జీవితంలోని సందర్భాలను స్ఫూర్తిగా తీసుకుని రాసుకున్న స్క్రిప్ట్ ఇది. కథకు తగినట్లు సత్యరాజ్, రోహిణి, ఆదా శర్మ లాంటి మంచి ఆర్టిస్టులు దొరికారు. ఆహ్లదకరమైన అనుభూతిని పంచే ఐదు విభిన్న కథలను ఈ సిరీస్లో చూస్తారు. మంచి లవ్స్టోరీ రాస్తే నాని హీరోగా తెరకెక్కిస్తాను’ అని చెప్పింది.