‘ప్రతి మనిషి జీవితంలో ఎత్తుపల్లాలుంటాయి. వాటిని అధిగమించి లక్ష్యాన్ని చేరుకోవడమే ‘అన్స్టాపబుల్’ షో కాన్సెప్ట్. ఇది నాకు బాగా నచ్చింది. అందుకే వ్యాఖ్యాతగా ఒప్పుకున్నా’ అన్నారు బాలకృష్ణ. ఆయన వ్యాఖ్యాతగా ‘ఆహా’ ఓటీటీ వేదికగా ‘అన్స్టాపబుల్’ షో నవంబర్ 4వ తేదీ నుంచి ప్రారంభంకానుంది. గురువారం కర్టెన్ రైజర్ కార్యక్రమం జరిగింది. ఈ సందర్భంగా బాలకృష్ణ మాట్లాడుతూ ‘నేను ఇప్పటివరకు సాంఘిక, జానపద, సోషియోఫాంటసీతో పాటు కుటుంబ కథా చిత్రాల్లో మెప్పించా. ప్రేక్షకులు నాపై అంతులేని ప్రేమాభిమానాలు కనబరిచారు. ‘ఆహా’ ఓటీటీ అంతర్జాతీయ ఓటీటీలకు ధీటుగా ఉంది. ప్రతి రంగంలోనూ ‘ఆహా’ పోటీ పడుతున్నది. మనుషులుగా మనమంతా ఒకటే. బావిలో కప్పలా ఉండకుండా బయటకు వచ్చినప్పుడే నిజమైన మనిషి ఆవిష్కరించబడతాడు. అలా చేసే ప్రయత్నమే ‘అన్స్టాపబుల్’. ఇదెంతగానో నాకు నచ్చింది. ఈ కార్యక్రమానికి హాజరయ్యే నటీనటులతో సంభాషించి వారి మనసులోని భావాల్ని పంచుకుంటా. మీకు చక్కటి వినోదాన్ని అందిస్తా’ అని చెప్పారు. నిజ జీవితంలో ఉన్నదిఉన్నట్లుగా మాట్లాడే బాలకృష్ణతో ఈ షో చేయడం ఆనందంగా ఉందని అల్లు అరవింద్ తెలిపారు.