పదేండ్ల తర్వాత కూడా గుర్తుండే సినిమా

ఎవడే సుబ్రమణ్యం, మహానటి, కల్కి 2898ఏడీ.. దర్శకుడిగా నాగ్‌అశ్విన్‌ ఏంటో చెప్పడానికి ఈ లైనప్‌ చాలు. వినోదం, సందేశం, సంభ్రమ, భావోద్వేగం.. ఇలా ఏ ఉద్వేగాన్నైనా అద్భుతంగా ఆవిష్కరించగల దర్శకుడు నాగ్‌ అశ్విన్‌. తాజాగా ఆయన నిర్మాతగా మారి, తన అభిమాన దర్శకుడు సింగీతం శ్రీనివాసరావు దర్శకత్వంలో ‘సింగ్‌ గీతం’ సినిమాను నిర్మించారు.

ఎవడే సుబ్రమణ్యం, మహానటి, కల్కి 2898ఏడీ.. దర్శకుడిగా నాగ్‌అశ్విన్‌ ఏంటో చెప్పడానికి ఈ లైనప్‌ చాలు. వినోదం, సందేశం, సంభ్రమ, భావోద్వేగం.. ఇలా ఏ ఉద్వేగాన్నైనా అద్భుతంగా ఆవిష్కరించగల దర్శకుడు నాగ్‌ అశ్విన్‌. తాజాగా ఆయన నిర్మాతగా మారి, తన అభిమాన దర్శకుడు సింగీతం శ్రీనివాసరావు దర్శకత్వంలో ‘సింగ్‌ గీతం’ సినిమాను నిర్మించారు. ఈ విభిన్న కథాచిత్రం ఈ నెల 11న ప్రపంచవ్యాప్తంగా విడుదల కానున్నది. ఈ సందర్భంగా శనివారం నాగ్‌అశ్విన్‌ హైదరాబాద్‌లో విలేకరులతో ముచ్చటించారు. ఆ విశేషాలివి.

• ఈ కథ ఇప్పటిది కాదు. ‘పుష్పక విమానం’ చిత్రానికి ముందే సింగీతం ఈ కథను కమల్‌హాసన్‌కి వినిపించారట. కమల్‌, సింగీతం ఇద్దరూ తీరిక లేకుండా సినిమాలు చేస్తున్న రోజులవి. ఈ కారణంగా ఈ కథ పట్టాలెక్కలేదు. చివరికి ఇన్నాళ్లకు కార్యరూపం దాల్చి, విడుదలకు సిద్ధమైంది. సింగీతంగారి కథలకు కాలంతో పనుండదు. పుష్పకవిమానం, ఆదిత్య 369, భైరవద్వీపం.. ఇవన్నీ ఏ కాలంలో వచ్చినా చూసే సినిమాలే.
• ఇది ఒక ఫిక్షనల్‌ స్టోరీ. కుబేరపురంలో గోల్డ్‌ మైన్స్‌ ఉంటాయి. ఆ ఊరికి, ఆ గోల్డ్‌ మైన్స్‌కు ఉన్న సంబంధం ఏంటి? అనేది సింగీతంగారి సిగ్నేచర్‌ స్టైల్‌లో, ఆయన ట్రేడ్‌ మార్క్‌ హ్యూమర్‌తో చెప్పడం జరిగింది. సింగీతం ఏ కథను ఆలోచించినా, అందులో మానవత్వం, వినోదం రెండూ ఉంటాయి. ఈ సినిమలో అదే టోన్‌ కనిపిస్తుంది. ఈ ప్రయాణంలో సింగీతంగారి దగ్గర్నుంచి చాలా నేర్చుకున్నాను. నిజానికి ఆయన్ను కలవడమే గొప్ప విషయం. అలాంటిది రెండేళ్లుగా ఆయనతో కలిసి ప్రయాణించడం, రోజూ మాట్లాడటం, ఆయనతో సినిమా తీయడం ఇదంతా మాట్లలో చెప్పలేని ఆనందం. దీన్ని ఒక గౌరవంగా భావిస్తున్నా.
• ఇది ప్రత్యేకమైన సబ్జెక్ట్‌. ఇలాంటి సినిమా ఇప్పటివరకూ రాలేదు. భవిష్యత్‌లోనూ రావడం కష్టం. సింగీతంగారిపై ఉన్న ప్రేమ, ఆయన విజన్‌పై ఉన్న ఇష్టంతో ఈ సినిమా చేశాను. ఈ కథను కొత్తవాళ్లతోనే చేయాలనేది సింగీతం అభిమతం. కొత్తవారితో పనిచేయడం ఆయనకిష్టం. ఈ కథకు కూడా అది అవసరం. ఇందులో మాటలన్నీ పాటల్లా ఉంటాయి. కానీ ప్రేక్షకులు కొద్ది సేపటికే ఆ విషయాన్ని మర్చిపోతారు. ఆ ప్రపంచంలోకి వెళ్లిపోతారు. పోస్ట్‌ ప్రొడక్షన్‌లో సినిమా చూశాను. ప్రతి సన్నివేశం వినోదాత్మకంగా సాగింది. 94ఏండ్ల వయసులో మాలాంటి దర్శకులకు ధీటుగా, ఒక టీనేజర్‌ తీసినట్టు సింగీతం ఈ సినిమా తీశారు. నేను కేవలం నిర్మాతగా మాత్రమే కాకుండా, సింగీతంగారి విజన్‌ని తెచ్చేందుకు ఒక అసిస్టెంట్‌ డైరెక్టర్‌గా ఈ సినిమాకు పనిచేశా.
• ఈ సినిమాలో నాన్‌స్టాప్‌ మ్యూజిక్‌ ఉంటుంది. కానీ ఎక్కడా మ్యూజిక్‌ వింటున్నాం అనే ఫీలింగ్‌ రాదు. దేవిశ్రీప్రసాద్‌ ఛాలెంజ్‌గా తీసుకొని ఈ సినిమాకు మ్యూజిక్‌ ఇచ్చారు. తన సంగీతంతో సహజంగా ఎంటర్‌టైన్‌ చేశారు. ఇది వారం రోజులు చూసి మర్చిపోయే సినిమా కాదు. పదేళ్ల తర్వాత కూడా గుర్తుండే సినిమా.