హైదరాబాద్: సీతాకోక చిలుక చిత్రం ఓ సూపర్ హిట్ ఫిల్మ్. ఆ సినిమాలో వాణీజయరాం పాడిన మిన్నేటి సూరీడు వచ్చేనమ్మా సాంగ్ మరో సూపర్ హిట్. అద్భుతమైన స్వరంతో వాణి పాడిన ఆ పాట చార్ట్బస్టర్ లిస్టులో చాన్నాళ్లూ మారుమోగింది. భిన్నమైన స్వరంతో వాణీజయరాం ఆ నాటి యువతను ఉర్రూతలూగించారు. 10 వేలకుపైగా పాటలు పాడిన 79 ఏళ్ల వాణీజయరాం ఇవాళ కన్నుమూశారు. వాణీజయరాం పాడిన ఆ పాట వీడియోను ఓసారి చూడండి..
ఇళయరాజా ఈ పాటకు మ్యూజిక్ అందించారు. కర్నాటక సంగీతంలోని శుభపంతువరలి రాగంలో సాగే ఈ యుగళ గీతాన్ని వాణీ రసరమ్యంగా పాడారు. భారతీరాజా కూడా ఆ సాంగ్ను చిత్రీకరించిన తీరు అనిర్వచనీయం. తమిళం, హిందీ, తెలుగు, మలయాళం, అస్సాం, బెంగాలీ భాషల్లోనూ ఆమె తన స్వరాలతో ప్రేక్షకుల్ని రంజింప చేశారు. వాణీ జయరాం గాత్రం విభిన్నమైంది. అయిదు దశాబ్ధాల పాటు ఆమె తన మధురమైన స్వరంతో సినీ లోకాన్ని ఏలారు.
బెస్ట్ ఫిమేల్ ప్లేబ్యాక్ సింగర్గా ఆమెకు మూడుసార్లు జాతీయ అవార్డు వచ్చింది. గత వారమే ఆమె పద్మ భూషణ్ అవార్డుకు ఎంపికైంది. శంకరాభరణం సినిమాకు ఆమె తన స్వరాన్ని అందించారు. ఆ ఫిల్మ్లో ఆమె పాడిన దొరకునా ఇటువంటి సేవా పాటకు జాతీయ అవార్డు దక్కింది. ఇక స్వాతికిరణం ఫిల్మ్లో పాడిన ఆనతినీయరా హరా పాటకు కూడా ఆమెకు జాతీయ అవార్డు దక్కడం విశేషం.