Brahmastra | ‘బ్ర‌హ్మ‌స్త్ర‌’లో చిరంజీవి.. వీడియో షేర్ చేసిన రాజ‌మౌళి!

June 13, 2022 / 02:41 PM IST

Chiranjeevi in brahmastra Movie | ఇండియాస్ మోస్ట్ యాంటిసిపేటెడ్ మూవీస్‌లో ‘బ్ర‌హ్మ‌స్త్ర’ ఒక‌టి. అయాన్ ముఖ‌ర్జీ ద‌ర్శ‌క‌త్వం వ‌హించిన ఈ చిత్రంలో బాలీవుడ్ స్టార్ క‌పుల్ ర‌ణ్‌బీర్ సింగ్‌, అలియా భ‌ట్ ప్రధాన పాత్ర‌ల్లో న‌టించారు. అత్యంత భారీ బ‌డ్జెట్‌తో తెర‌కెక్కిన ఈ చిత్రానికి తెలుగులో ద‌ర్శ‌క దిగ్గ‌జం ఎస్‌.ఎస్ రాజ‌మౌళి స‌మ‌ర్ప‌కుడిగా వ్య‌వహ‌రిస్తున్నాడు. షూటింగ్ ప్రారంభ‌మైన‌ప్పుడు తెలుగులో ఈ సినిమాపై ఎలాంటి అంచ‌నాల్లేవు. కానీ కొన్ని రోజుల త‌ర్వాత నాగార్జున సినిమాలో భాగం కావ‌డంతో మంచి క్రేజ్ వ‌చ్చింది. ఇక కొన్ని నెల‌ల కింద రాజ‌మౌళి ఈ చిత్రాన్ని స‌మ‌ర్పిస్తున్నాడ‌ని తెలియ‌డంతో సినిమాపై మరింత క్రేజ్ పెరిగింది. ఇదిలా ఉంటే తాజాగా మెగాస్టార్ చిరంజీవి కూడా ఈ చిత్రంలో భాగం కాబోతున్న‌ట్లు మేక‌ర్స్ వెల్ల‌డించారు.

‘బ్ర‌హ్మస్త్రం’ సినిమా ట్రైల‌ర్‌కు మెగాస్టార్ వాయిస్ ఓవ‌ర్ ఇవ్వ‌బోతున్న‌ట్లు మేక‌ర్స్ ప్ర‌క‌టించారు. ఈ నేప‌థ్యంలో రాజ‌మౌళి ఓ వీడియోను షేర్ చేశాడు. ఆ బ్రహ్మాస్త్రం యొక్క విధి తన అరచేతి రేఖలో చిక్కుకుందన్న విషయం ఆ యువకుడికే తెలియదు. అతనే శివ అంటూ చిరంజీవి చెబుతున్న వీడియోను జ‌క్క‌న్న ఇన్‌స్టాగ్రామ్‌లో షేర్ చేశాడు. ఈ సినిమా ట్రైల‌ర్ జూన్ 15న విడుద‌ల కానుంది.
చిత్రం నుంచి విడుద‌లైన ప్ర‌చార చిత్రాలు సినిమాపై ప్రేక్ష‌కుల‌లో ఆస‌క్తిని క్రియేట్ చేస్తున్నాయి. ఇటీవ‌లే విడుద‌లైన నాగార్జున పోస్ట‌ర్‌కు విశేష స్పంద‌న వ‌చ్చింది. నాగార్జున ఈ చిత్రంలో అజ‌య్ విశిష్ట్ పాత్ర‌లో న‌టించాడు.

మైథ‌లాజిక‌ల్ అడ్వెంచ‌రస్ డ్రామాగా తెర‌కెక్కిన ఈ చిత్రం మూడు భాగాలుగా రూపొందింది. అందులో మొద‌టి భాగం ‘శివ’ పేరుతో హిందీతో పాటు తెలుగు, త‌మిళ‌, క‌న్న‌డ‌, మ‌ల‌యాళ భాష‌ల్లో విడుద‌ల కానుంది. బిగ్‌బీ అమితాబ్‌, మౌనీరాయ్ కీల‌క‌పాత్ర‌ల్లో న‌టించిన ఈ చిత్రాన్ని ఫాక్స్ స్టార్ స్టూడియోస్‌, ధ‌ర్మ ప్రొడ‌క్ష‌న్స్‌, ప్రైమ్ ఫోక‌స్‌, స్టార్ లైట్ పిక్చ‌ర్స్ సంయుక్తంగా నిర్మించాయి. కాగా ఈ చిత్ర ట్రైల‌ర్ జూన్ 15న విడుద‌ల కానుంది.