Vikram | ‘విక్ర‌మ్’ ఫ‌స్ట్ సింగిల్‌ విడుద‌ల‌.. ఆక‌ట్టుకుంటున్న క‌మ‌ల్ సిగ్నేచ‌ర్‌ స్టెప్స్‌!

Vikram | విశ్వ‌న‌టుడు క‌మ‌ల్ హాస‌న్ ట్రెండ్‌కు త‌గ్గ‌ట్టుగా క‌థ‌ల‌ను ఎంచుకుంటూ యువ హీరోల‌కు ధీటుగా సినిమాల‌ను చేస్తుంటాడు. ఈయ‌న‌ నుంచి సినిమా వ‌చ్చి దాదాపు నాలుగేళ్ళు దాటింది. కోలీవుడ్‌తో పాటు టాలీవుడ్ ప్రేక్ష‌కులు ఎంతగానో ఎదురు చూస్తున్న చిత్రం ‘విక్ర‌మ్‌’. ‘మాస్ట‌ర్’ ఫేం లోకేష్ క‌న‌గ‌రాజ్ ద‌ర్శ‌క‌త్వం వ‌హించిన ఈ చిత్రం భారీ యాక్ష‌న్ ఎంట‌ర్టైన‌ర్‌గా తెర‌కెక్కింది. గ‌తేడాది విడుద‌లైన టైటిల్ టీజ‌ర్ నుంచి ఇటీవ‌లే విడుద‌లైన ట్రైల‌ర్‌ వ‌ర‌కు ప్ర‌తి ఒక్క‌టి ప్రేక్ష‌కుల అంచ‌నాల‌ను అంతకంత‌కూ పెంచుతున్నాయి. గ‌త‌కొంత కాలంగా క‌మ‌ల్ నుంచి ఆశించిన స్థాయిలో ఒక్క సినిమా కూడా రాలేదు. ఈ క్ర‌మంలో టీజ‌ర్‌, ట్రైల‌ర్‌లు మ‌ళ్ళీ అప్ప‌టి క‌మ‌ల్‌ను గుర్తుచేస్తున్నాయి. యాక్ష‌న్ థ్రిల్ల‌ర్‌గా తెర‌కెక్కిన ఈ చిత్రం జూన్‌3న విడుద‌ల కానుంది.

ఈ క్ర‌మంలో చిత్రబృందం త‌ర‌చూ ఏదో ఒక అప్‌డేట్‌తో ప్రేక్ష‌కులను ప‌లక‌రిస్తుంది. తాజాగా ఈ చిత్రం నుంచి ‘మ‌త్తుగా మ‌త్తుగా’ అంటూ సాగే లిరిక‌ల్ వీడియో సాంగ్‌ను మేక‌ర్స్ విడుద‌ల చేశారు. చంద్ర‌బోస్ సాహిత్యం అందించిన ఈ పాట‌ను క‌మ‌ల్ ఆల‌పించాడు. ఈ పాట‌లో క‌మ‌ల్ స్టెప్స్ ఆకట్టుకుంటున్నాయి. మ‌ల‌యాళ స్టార్ ఫాహాద్ ఫాజిల్‌, తమిళ స్టార్ విజ‌య్ సేతుప‌తి కీల‌క పాత్ర‌ల్లో న‌టించారు. సూర్య  గెస్ట్ రోల్‌లో క‌నిపించ‌నున్నాడు. అనిరుధ్ ర‌విచంద్ర‌న్ సంగీతంఅందించాడు. రాజ్ క‌మ‌ల్ ఫిలింస్ ఇంట‌ర్నేష‌న‌ల్ బ్యాన‌ర్‌పై ఆర్. మహేంద్ర‌న్‌తో క‌లిసి క‌మ‌ల్ స్వీయ నిర్మాణంలో ఈ చిత్రాన్ని తెర‌కెక్కించాడు.