udhayanidhi stalin | ఇక పై సినిమాలు చేయ‌ను.. అదే నా ఆఖ‌రి సినిమా :ఉద‌య‌నిధి స్టాలిన్‌

udhayanidhi stalin | త‌మిళ‌నాడు సీఎం ఎమ్‌.కే స్టాలిన్ త‌న‌యుడిగా ఇండ‌స్ట్రీలోకి ఎంట్రీ ఇచ్చినా త‌మిళ‌నాట త‌న‌కంటూ ప్ర‌త్యేక గుర్తింపును ఏర్ప‌ర‌చుకున్న న‌టుడు ఉద‌య‌నిధి స్టాలిన్‌. ఓకే ఓకే, శ్రీనుగాడి ల‌వ్‌స్టోరి, సైకో వంటి చిత్రాల‌తో తెలుగు ప్రేక్ష‌కుల‌కు ప‌రిచ‌య‌మ‌య్యాడు. ప్ర‌స్తుతం ఈయ‌న న‌టించిన చిత్రం ‘నెంజుకు నిధి’. బాలీవుడ్‌లో సూప‌ర్ హిట్ట‌యిన ‘ఆర్టిక‌ల్‌15’కు రీమేక్‌గా ఈ చిత్రం తెర‌కెక్కింది. ఇటీవ‌లే విడుద‌లైన ట్రైల‌ర్‌కు ఊహించని విధంగా ప్రేక్ష‌కుల నుంచి విశేష‌ స్పంద‌న వ‌చ్చింది. ప్ర‌స్తుతం ప్ర‌మోష‌న్ల‌ను జ‌రుపుకుంటున్న ఈ చిత్రం మే 20న ప్రేక్ష‌కుల ముందుకు రానుంది. ఈ క్ర‌మంలో తాజాగా జ‌రిగిన ఓ ఇంట‌ర్వూలో ఉద‌య‌నిధి స్టాలిన్ షాకింగ్ విష‌యాన్ని బ‌య‌ట‌పెట్టాడు.

ఉద‌య‌నిధి ఈ చిత్రం విడుద‌ల కాకముందే మారీ సెల్వ‌రాజ్ ద‌ర్శ‌క‌త్వంలో మామ‌న్న‌న్ అనే సినిమాను చేస్తున్నాడు. ప్ర‌స్తుతం షూటింగ్ శ‌ర‌వేగంగా జ‌రుపుకుంటున్న ఈ చిత్రం ఇదే ఏడాది ద్వితియార్థంలో రానుంది. అయితే నెంజుకు నిధి ప్ర‌మోష‌న్ల‌లో భాగంగా ఈ చిత్రం ఉద‌య‌నిధికి ఆఖ‌రి చిత్రం అని తెలిపాడు. ఇటు సినిమాలు అటు రాజ‌కీయాలు బ్యాలెన్స్ చేయ‌లేక‌పోవ‌డం వ‌ల్లే ఈ నిర్ణ‌యం తీసుకుంటున్న‌ట్లు తెలిపాడు. ఇక ఉద‌య‌నిధి త‌మిళ‌నాడులో జ‌రిగిన గ‌త ఎన్నిక‌ల్లో ఎమ్మెల్యేగా గెలుపొందిన విష‌యం తెలిసిందే.