మహా విషాదం.. గుండెపోటుతో కన్నుమూసిన లెజెండరీ దర్శకుడు..

కన్నుమూసిన లెజెండరీ దర్శకుడు | మలయాళ సినిమాలో ఈ విషాదం చోటు చేసుకుంది. 50 సినిమాలకు పైగా కథలు అందించి అరడజను సినిమాలు తెరకెక్కించి రచయితగా, దర్శకుడిగా ఎనలేని సేవలు అందించిన లెజెండ్ డెన్నిస్ జోసెఫ్ మరణించారు.

సినిమా ఇండస్ట్రీలో విషాదాలకు అంతులేకుండా పోతోంది. ఒకటి మర్చిపోయే లోపు మరో రెండు మూడు వచ్చి మనసును బలంగా తాకుతున్నాయి. టాలీవుడ్ లో ప్రముఖ నటుడు జర్నలిస్టు టిఎన్ఆర్ మరణం జీర్ణించుకోక ముందే మరో చేదు వార్త వినాల్సి వచ్చింది. ఈ సారి మలయాళ సినిమాలో ఈ విషాదం చోటు చేసుకుంది. 50 సినిమాలకు పైగా కథలు అందించి అరడజను సినిమాలు తెరకెక్కించి రచయితగా, దర్శకుడిగా ఎనలేని సేవలు అందించిన లెజెండ్ డెన్నిస్ జోసెఫ్ మరణించారు. కొట్టాయం హాస్పిటల్లో గుండెపోటుతో ఆయన కన్నుమూసినట్లు కుటుంబ సభ్యులు తెలిపారు. మలయాళ సినిమాకు ఆయన అందించిన సేవలు ఎవరు మరచిపోలేరు.

మమ్ముట్టి, సురేష్ గోపి, మోహన్ లాల్ ఇలా ప్రతి ఒక్కరు స్టార్ హీరోతో పని చేశాడు డెన్నిస్ జోసెఫ్. ప్రతి ఒక్కరూ ఆయన కథలతో సినిమా చేశారు. ఎన్నో అద్భుతమైన సినిమాలకు కథలు మాటలు రాసిన లెజెండరీ స్క్రిప్ట్ రైటర్ ఈయన. 1985లో ఈరన్ సంధ్య సినిమాతో డెన్నిస్ ప్రయాణం మొదలైంది. 2021లో పవర్ స్టార్ సినిమా వరకు ఈయన ప్రస్థానం సాగింది. ఈ మధ్యలో ఎన్నో అద్భుతమైన సినిమాలకు స్క్రిప్ట్ అందించారు జోసెఫ్.

ఈయన అందించిన కథతో వచ్చిన సినిమాలు మలయాళం సినిమా చరిత్రను తిరగరాసాయి. ఇంతటి అద్భుతమైన టెక్నీషియన్ మరణించడంతో మలయాళ సినిమా అనాధ అయిపోయింది అంటూ పలువురు సినీ ప్రముఖులు సంతాపం వ్యక్తం చేస్తున్నారు. స్టార్ హీరోలు కూడా డేన్నిస్ జోసెఫ్ తో తమకు ఉన్న అనుబంధాన్ని గుర్తు చేసుకుంటున్నారు. ఈయన మరణం తీరనిలోటు అంటూ ఆయన కుటుంబానికి ప్రగాఢ సానుభూతి తెలియజేశారు.