Visit:
2023లో ‘మ్యాడ్‌’ సినిమా చేసిన హంగామా అంతాఇంతా కాదు. ఆ సినిమా సీక్వెల్‌గా ‘మ్యాడ్‌ స్కేర్‌’ రానున్నదని తెలియగానే.. ఆడియన్స్‌లో అంచనాలు అమాంతం పెరిగిపోయాయి. కల్యాణ్‌ శంకర్‌ దర్శకత్వంలో హారిక సూర్యదేవర, సాయిసౌజన్య నిర్మిస్తున్న ఈ చిత్రంలో సంగీత్‌ శోభన్‌, నార్నే నితిన్‌, రామ్‌ నితిన్‌ ప్రధాన పాత్రలు పోషిస్తున్న విషయం తెలిసిందే. ప్రమోషన్‌లో భాగంగా ‘లడ్డుగాని పెళ్లి..’ అంటూ ఈ సినిమా నుంచి విడుదలైన తొలి గీతానికి విశేషమైన స్పందన లభించిందని మేకర్స్‌ ఆనందం వ్యక్తం చేశారు. ఈ క్రమంలోనే శనివారం ఈ సినిమా నుంచి రెండో గీతాన్ని విడుదల చేశారు.
‘నా ముద్దు పేరు పెట్టుకున్న స్వాతిరెడ్డి.. నే ముట్టుకుంటే భగ్గుమంది పచ్చ ఎండుగడ్డి..’ అంటూ సురేష్‌ గంగుల రాసిన ఈ పాటను భీమ్స్‌ సిసిరోలియో స్వరపరచి, స్వయంగా ఆలపించారు. ఈ పాట యువతను ఉర్రూతలూగించడం ఖాయమని మేకర్స్‌ నమ్మకం వ్యక్తం చేస్తున్నారు. ఈ పాటలో హీరోలు సంగీత్‌ శోభన్‌, నార్నే నితిన్‌, రామ్‌ నితిన్‌లతో పాటు రెబా మౌనికా కూడా ప్రత్యేక ఆకర్షణగా నిలచిందని వారు తెలిపారు. ఈ చిత్రానికి సమర్పణ: సూర్యదేవర నాగవంశీ.
