Kantara-2 Movie | ఊహించని రేంజ్‌లో కాంతార ప్రీక్వెల్‌.. బడ్జెట్‌ వంద కోట్లకు పైమాటే అట..!

Kanatara Prequel | తొలిపార్టు ఊహించని రేంజ్‌లో హిట్టు కావడంతో రిషబ్‌ శెట్టికి హోంబలే సంస్థ పూర్తి స్వేచ్ఛనిచ్చారట. దాంతో ప్రీక్వెల్‌ సినిమాను మరో స్థాయికి తీసుకెళ్లే విధంగా రిషబ్‌ ప్లాన్‌ చేస్తున్నాడట.

Kanatara Prequel | కొన్ని సినిమాలను మాటల్లో వర్ణించడానికి పదాలు చాలవు. డిక్షనరి కొనుక్కొని కొత్త కొత్త పదాలను వెతుక్కోవాల్సి ఉంటుంది. అలా మాటల్లో చెప్పలేని సినిమాల్లో ‘కాంతార’ ఒకటి. తెలిసిన కథే కావచ్చు.. కానీ ఆ కథనే ఎంత కొత్తగా చెప్పాము అనేది దర్శకుడి ప్రతిభకు నిదర్శనం. ఈ విషయంలో వందకు వంద మార్కులు కొట్టేశాడు దర్శకుడు రిషబ్‌ శెట్టి. దర్శకుడిగా రిషబ్‌శెట్టి ఒక మెట్టు ఎక్కితే.. నటుడిగా పది మెట్లు ఒకేసారి ఎక్కాడు. గతేడాది బిగ్గెస్ట్‌ హిట్లలో ‘కాంతార’ ఒకటి. చిన్న సినిమాగా విడుదలై బాక్సాఫీస్‌ దగ్గర సంచలనాలు సృష్టించింది. భాషతో సంబంధంలేకుండా ప్రతీ ఏరియాలో ఓ ఊపే ఊపేసింది.

ఇక ఈ సినిమాకు పార్ట్‌-2 కూడా తెరకెక్కబోతుందంటూ కొన్ని నెలల కింద రిషబ్‌ అనౌన్స్‌మెంట్‌ ఇచ్చేశాడు. అంతేకాకుండా ఇది సీక్వెల్‌లా కాకుండా ప్రీక్వెల్‌లాగా రూపొందిస్తాడట. అంటే రిషబ్‌ తండ్రి గురించి, ఆయన చనిపోవడం, ఆ పల్లె సంప్రదాయాల వెనుక మూలం ఎక్కడ మొదలయ్యింది, దేవుడు ప్రత్యేకంగా ఒక తెగవాళ్లనే ఎందుకు పూనుతాడు లాంటి ఎన్నో ప్రశ్నలకు సమాధానం ప్రీక్వెల్‌లో చూపించబోతున్నాడు. దీని కోసం రిషబ్‌ గ్రౌండ్‌వర్క్‌ చాలానే చేశాడట. ఇక తొలిపార్టును రూ.16 కోట్లలోపే ముగించిన రిషబ్‌.. ప్రీక్వెల్‌ కోసం ఏకంగా రూ.120 కోట్ల బడ్జెట్‌ను ప్లాన్‌ చేస్తున్నాడట. ఒక్క ప్రీ ప్రొడక్షన్‌ కోసమే రూ.20 కోట్లు ఖర్చు చేసినట్లు తెలుస్తుంది.

తొలిపార్టు ఊహించని రేంజ్‌లో హిట్టు కావడంతో రిషబ్‌ శెట్టికి హోంబలే సంస్థ పూర్తి స్వేచ్ఛనిచ్చారట. దాంతో ప్రీక్వెల్‌ సినిమాను మరో స్థాయికి తీసుకెళ్లే విధంగా రిషబ్‌ ప్లాన్‌ చేస్తున్నాడట. అంతేకాకుండా కాంతార-1లో ఒకరిద్దరూ మినహాయించి పెద్దగా స్టార్‌ కాస్ట్‌ ఏమి లేదు. కానీ ప్రీక్వెల్‌లో మాత్రం స్టార్‌ కాస్ట్‌ను తీసుకోబోతున్నట్లు టాక్‌. నవంబర్‌లో షూటింగ్‌ను మొదలు ప్టెటి.. ఆరు నెలలు షూటింగ్‌, ఆపై రెండు నెలలు పోస్ట్‌ ప్రొడక్షన్‌ పనులు పూర్తి చేసుకుని వచ్చే ఏడాది ద్వితియార్థంలో సినిమాను ప్రేక్షకులు ముందుకు తీసుకురావాలని ప్లాన్‌ చేస్తున్నారట.