యూనివర్సల్ హీరో కమల్ హాసన్ (Kamal Haasan) హోం బ్యానర్ రాజ్ కుమార్ ఫిలిమ్స్ ఇంటర్నేషనల్పై తెరకెక్కించిన చిత్రం విక్రమ్ (Vikram). జూన్ 3న ప్రపంచవ్యాప్తంగా గ్రాండ్గా విడుదలైన ఈ సినిమా బాక్సాపీస్ వద్ద కలెక్షన్ల సునామి సృష్టిస్తోంది. కేవలం 11 రోజుల్లోనే వరల్డ్ వైడ్గా
రూ.300 కోట్ల క్లబ్ (Rs 300 crore Club)లోకి చేరిపోయింది. ఇక ఈ సినిమా బ్లాక్ బాస్టర్ హిట్ కొట్టి..కాసుల పంట పండిస్తున్న నేపథ్యంలో..లాభాల ద్వారా వచ్చిన మొత్తాన్ని ఏం చేస్తాడో ఓ నేషనల్ మీడియాతో చేసిన చిట్చాట్లో చెప్పుకొచ్చాడు కమల్ హాసన్.
‘ ప్రతీ ఒక్కరు అభివృద్ధి చెందాలంటే..డబ్బుల కోసం బాధపడని నాయకుడు కావాలి. నేను క్షణాల్లో రూ.300 కోట్లు సంపాదిస్తానని అంటే..ఎవరూ అర్థం చేసుకోలేదు. నేను ఊరికెనే ఛాతి చరుచుకుంటున్నానని అనుకున్నారు. కానీ నేను చెప్పింది నిజం కావడం (కలెక్షన్లను ఉద్దేశించి) మీరిప్పుడు చూడొచ్చు. ఈ సినిమా ద్వారా వచ్చిన డబ్బుతో నా రుణాలన్నీ కట్టేస్తానన్నాడు’ కమల్
‘ అంతేకాదు నా కుటుంబం, స్నేహితులకు చేయగలిగిందేదైనా చేస్తాను. ఆ తర్వాత నా దగ్గర ఏమీ లేకుంటే..నా దగ్గర ఇవ్వడానికి ఇంకేమీ లేదు అని చెబుతా. ఇతరుల దగ్గర డబ్బు తీసుకుని సహాయం చేసినట్లు నటించాల్సిన అవసరం నాకు లేదు. నాకు ఎటువంటి గ్రాండ్ టైటిల్స్ అవసరం లేదు. నేను కేవలం మంచి మనిషిగా ఉండాలనుకుంటున్నానని’ చెప్పుకొచ్చాడు కమల్ హాసన్.
కమల్ హాసన్ ఇప్పటికే కోస్టార్ సూర్యకు రోలెక్స్ వాచ్ బహుమతిగా ఇచ్చాడు. మరోవైపు డైరెక్టర్ లోకేశ్ కనగరాజ్ (Lokesh Kanagaraj)కు ఖరీదైన కారును బహుమతిగా అందించాడు. దీంతోపాటు సినిమాకు పనిచేసిన అసిస్టెంట్ డైరెక్టర్లకు 13 మోటార్ బైక్స్ అందించాడు.