‘భగవంత్ కేసరి’ చిత్రంలో స్త్రీ శక్తి, మహిళా సాధికారత గురించి గొప్పగా ఆవిష్కరించారని, ఇలాంటి స్ఫూర్తివంతమైన కథలో భాగం కావడం ఆనందంగా ఉందని చెప్పింది కాజల్ అగర్వాల్. ఈ సినిమాలో కాత్యాయని పాత్రలో ఆమె కనిపించనుంది. బాలకృష్ణ కథానాయకుడిగా అనిల్ రావిపూడి దర్శకత్వంలో తెరకెక్కిన ఈ చిత్రం ఈ నెల 19న విడుదలకానుంది. ఈ సందర్భంగా కాజల్ అగర్వాల్ మాట్లాడుతూ ‘కాత్యాయని ఒక సైకాలజిస్ట్.
తను చాలా తెలివైన మహిళ. కథాగమనంలో నా పాత్ర కీలకంగా ఉంటుంది. ఈ సినిమాలోని మహిళా శక్తి అనే కాన్సెప్ట్ నాకు వ్యక్తిగతంగా బాగా కనెక్ట్ అయింది. ఆడపిల్లను ధైర్యంగా పెంచాలనే అంశం గొప్పగా అనిపించింది. ఇలాంటి కథ నేటి సమాజానికి అవసరం అనిపించింది’ అని చెప్పింది. బాలకృష్ణ సెట్స్లో చాలా సరదాగా ఉంటారని, షూటింగ్ అంతా హ్యాపీగా సాగిందని కాజల్ అగర్వాల్ తెలిపింది. ‘దర్శకుడు అనిల్రావిపూడిలో సెన్సాఫ్ హ్యూమర్ చాలా ఎక్కువ. ఆయన తీసిన ‘ఎఫ్-2’ ‘ఎఫ్-3’ సినిమాలు బాగా నచ్చాయి. ‘భగవంత్ కేసరి’లో ఆయన శైలి వినోదంతో పాటు సందేశం కూడా ఉంటుంది. ప్రస్తుతం ‘సత్యభామ’ సినిమా చేస్తున్నా. ఇక ‘ఇండియన్-2’లో నా పాత్ర వైవిధ్యంగా ఉంటుంది. వీటితో పాటు మరికొన్ని చిత్రాలు చర్చల దశలో ఉన్నాయి’ అని కాజల్ అగర్వాల్ చెప్పింది.