Sir Movie | అప్పుడే ఓటీటీలోకి వచ్చేస్తున్న సార్‌ మూవీ.. స్ట్రీమింగ్‌ ఎప్పుడంటే?

కంటెంట్‌ కొత్తగా ఉంటే చాలు తెలుగు ప్రేక్షకులు భాషతో సంబంధంలేకుండా పరభాష సినిమాలను కూడా బ్లాక్‌బస్టర్‌లు చేసేస్తుంటారు. ఇటీవలే విడుదలైన సార్‌ మూవీ కూడా ఈ కోవలోకే చెందిందే.

Sir Movie On OTT | కంటెంట్‌ కొత్తగా ఉంటే చాలు తెలుగు ప్రేక్షకులు భాషతో సంబంధంలేకుండా పరభాష సినిమాలను కూడా బ్లాక్‌బస్టర్‌లు చేసేస్తుంటారు. ఇటీవలే విడుదలైన సార్‌ మూవీ కూడా ఈ కోవలోకి చెందిందే. ధనుష్‌కు తెలుగులో పర్వాలేదనిపించే మార్కెటే ఉంది. కానీ మరీ ఆయన సినిమాలు భీభత్సమైన కలెక్షన్‌లు సాధించిన దాఖలాలు లేవు. గతేడాది రిలీజైన తిరు తమిళంలో రూ.70 కోట్ల గ్రాస్‌ కలెక్ట్‌ చేయగా.. తెలుగులో రూ.4 కోట్ల గ్రాస్‌ మాత్రమే కలెక్ట్‌ చేసింది. అయితే సార్‌ మూవీ మాత్రం ఇప్పటికే రూ.30 కోట్లకు పైగా గ్రాస్‌ కలెక్ట్‌ చేసి ధనుష్‌కు తెలుగులో ఊహించని విజయాన్ని తెలుగు ప్రేక్షకులు అందించారు. ఇందులో మరో విశేషం ఏంటంటే సార్ మూవీ తమిళ కలెక్షన్‌లతో పోలిస్తే తెలుగు కలెక్షన్‌లే అధికంగా ఉన్నాయి.

రిలీజ్‌కు ముందు జరిపిన ప్రమోషన్‌లతో తెలుగులో ఈ సినిమాపై ఎక్కడలేని బజ్‌ క్రియేట్‌ అయింది. పైగా తెలుగు నిర్మాణ సంస్థ కావడం, తెలుగు దర్శకుడు కావడంతో సార్‌ సినిమాకు అదిరిపోయే ఓపెనింగ్స్‌ వచ్చాయి. తొలిరోజు మిక్స్డ్‌ టాక్‌ తెచ్చుకున్నా.. టాక్‌తో సంబంధంలేకుండా భారీ కలెక్షన్‌లు రాబడుతూ వచ్చింది. ఇక ఇదిలా ఉంటే ఈ సినిమా డిజిటల్‌ రిలీజ్‌ కోసం ఓటీటీ ప్రియులు ఎంతగానో ఎదురు చూస్తున్నారు. కాగా ఈ సినిమా ఓటీటీ రిలీజ్‌కు సంబంధించిన ఓ వార్త నెట్టింట తెగ వైరల్‌ అవుతుంది.

ఈ సినిమా డిజిటల్‌ హక్కులను నెట్‌ఫ్లిక్స్‌ సంస్థ దక్కించుకుంది. కాగా మార్చి 22 నుంచి ఈ సినిమాను తెలుగుతో పాటు తమిళ భాషల్లోనూ స్ట్రీమింగ్‌ చేయాలని నెట్‌ఫ్లిక్స్ సంస్థతో సార్‌ మూవీ మేకర్స్‌ డీల్‌ కుదిరించుకున్నట్లు సమాచారం‌. దీనిపై త్వరలోనే అధికారిక ప్రకటన కూడా వచ్చే చాన్స్‌ ఉంది. వెంకీ అట్లూరి దర్శకత్వం వహించిన ఈ సినిమాను సితార సంస్థ నిర్మించింది. ధనుష్‌కు జోడీగా సంయుక్త మీనన్‌ నటించింది.