సంక్రాంతి సినిమాల రిలీజ్ల గురించి గురువారం తెలుగు ఫిలిం ఛాంబర్, తెలంగాణ ఫిలిం ఛాంబర్, తెలుగు ఫిలిం ప్రొడ్యూసర్స్ కౌన్సిల్ హైదరాబాద్లో సమావేశం నిర్వహించారు. ఈ నెల 13న విడుదలకు సిద్ధమైన రవితేజ ‘ఈగల్’ సినిమాను వాయిదా వేస్తున్నట్లు ప్రకటించారు. ఈ సందర్భంగా దిల్రాజు మాట్లాడుతూ హీరో రవితేజ, పీపుల్స్ మీడియా వారికి ప్రత్యేకంగా ధన్యవాదాలు తెలుపుతున్నామని అన్నారు. ఈ ఏడాది సంక్రాంతి సందర్భంగా విడుదల చేయాలనుకున్న ఐదు సినిమాల నిర్మాతలతో సమావేశమై ఏదో ఒక సినిమాను వాయిదా వేయాలని కోరామని చెప్పారు. ఒక సినిమా వెనక్కి తగ్గితే ఏదో జరిగిపోయినట్టు కాకుండా రవితేజ సహకరించిన తీరును చూసి ప్రేక్షకులు గర్వపడాలని, ఈ నిర్ణయాన్ని సహృదయంతో స్వీకరించాలని కోరారు. నిరుడు సంక్రాంతి సందర్భంగా మూడు సినిమాలకే ఇబ్బంది అయ్యిందని, ఈ సారి ఐదు సినిమాలు విడుదల చేస్తే గత ఏడాది పరిస్థితే ఏర్పడుతుందన్న ఆలోచనతో ఈ నిర్ణయం తీసుకున్నామని తెలిపారు. ఫిలిం ఛాంబర్, ప్రొడ్యూసర్స్ కౌన్సిల్ అభ్యర్థన మేరకు ‘ఈగల్’ సినిమా వాయిదా వేసుకున్నారని దిల్రాజు చెప్పారు. ఫిబ్రవరి 9న రిలీజ్ కావాలని అడుగుతున్నారని.. అదే రోజున రెండు సినిమాలు విడుదలవుతున్నట్టు గతంలోనే ప్రకటించారని ఆయన చెప్పారు. నిర్మాత నాగవంశీ ‘టిల్లు స్వేర్’ను మరో తేదీకి వాయిదా వేసుకునేందుకు సిద్ధమయ్యారని, మరో చిత్రం ‘యాత్ర-2’ కూడా వాయిదా వేసుకోవాలని మేకర్స్ను అడుగుతామని దిల్రాజు అన్నారు.