ప్రతీ మహిళా ఇష్టపడే సినిమా

‘విశ్వనాథ్‌ అండ్‌ సన్స్‌' ‘ఇరుముడి’ వంటి మ్యూజికల్‌ బ్లాక్‌బస్టర్స్‌తో ఈ ఏడాది సూపర్‌ఫామ్‌లో ఉన్నారు అగ్ర సంగీత దర్శకుడు జీవీ ప్రకాశ్‌కుమార్‌. ఆయన స్వరాల్ని అందించిన తాజా చిత్రం ‘ఆకాశంలో ఒక తార’.

‘విశ్వనాథ్‌ అండ్‌ సన్స్‌’ ‘ఇరుముడి’ వంటి మ్యూజికల్‌ బ్లాక్‌బస్టర్స్‌తో ఈ ఏడాది సూపర్‌ఫామ్‌లో ఉన్నారు అగ్ర సంగీత దర్శకుడు జీవీ ప్రకాశ్‌కుమార్‌. ఆయన స్వరాల్ని అందించిన తాజా చిత్రం ‘ఆకాశంలో ఒక తార’. దుల్కర్‌ సల్మాన్‌ హీరోగా పవన్‌ సాధినేని దర్శకత్వంలో రూపొందిన ఈ చిత్రం ఈ నెల 20న విడుదలకానుంది. ఈ సందర్భంగా శుక్రవారం మ్యూజిక్‌ డైరెక్టర్‌ జీవీ ప్రకాశ్‌కుమార్‌ విలేకరులతో ముచ్చటిస్తూ సినిమా సంగీత విశేషాల్ని పంచుకున్నారు.

‘లక్కీ భాస్కర్‌’ తర్వాత దుల్కర్‌ సల్మాన్‌తో ‘ఆకాశంలో ఒక తార’ చేయడం ఆనందంగా ఉంది. మహిళా సాధికారతను తెలియజెప్పే స్ఫూర్తివంతమైన కథ ఇది. ఈ చిత్రానికి జాతీయ అవార్డులు వస్తాయనే నమ్మకం ఉంది. కుటుంబ ప్రేక్షకులందరికీ ఈ కథ నచ్చుతుంది. కథలోని ఎమోషన్స్‌ను బట్టి మ్యూజిక్‌ను ప్రత్యేకంగా డిజైన్‌ చేశాను. ఇదొక మోడరన్‌ క్లాసిక్‌ సినిమాలా ప్రేక్షకులకు గొప్ప అనుభూతినందిస్తుంది. ప్రతీ మహిళ ఇష్టపడే సినిమా అవుతుంది.

ఈ సినిమా కోసం డిఫరెంట్‌ సౌండ్‌ డిజైన్‌ చేశాం. అందుకోసం స్పెషల్‌ సింథసైజర్స్‌ను ఉపయోగించాం. తప్పకుండా మ్యూజిక్‌ ఓ యూనిక్‌ ఫీల్‌ని అందిస్తుంది. ఇందులో మొత్తం ఐదు పాటలున్నాయి. పాటలు, నేపథ్య సంగీతం ఒకదానితో ఒకటి అనుసంధానమై ఉంటాయి. శృతిహాసన్‌తో ఓ పాట పాడించాం. అది త్వరలో విడుదల కాబోతున్నది.

మ్యూజిక్‌, యాక్టింగ్‌ను బ్యాలెన్స్‌ చేస్తూ కెరీర్‌ను కొనసాగిస్తున్నా. ‘లక్కీ భాస్కర్‌’, ‘ఇరుముడి’, ‘విశ్వనాథ్‌ అండ్‌ సన్స్‌’ వంటి వరుస విజయాల వల్ల తెలుగులో అవకాశాలు బాగా పెరిగాయి. టాలీవుడ్‌ ప్రస్తుతం అద్భుతమైన దశలో ఉంది. దర్శకులు కొత్త కాన్సెప్ట్స్‌తో ముందుకొస్తున్నారు. అందుకే మ్యూజిక్‌ పరంగా కూడా కొత్తదనం కనిపిస్తున్నది.

నేను నటించిన తాజా చిత్రం ఫిబ్రవరిలో రిలీజ్‌ కాబోతున్నది. అలాగే సెల్వరాఘవన్‌ దర్శకత్వంలో ఓ సినిమా చేస్తున్నా. ఇక మ్యూజిక్‌ పరంగా.. తెలుగులో ‘జనవరి 12’ ‘శ్రీశ్రీ’ చిత్రాలతో పాటు ఇటీవల మొదలైన సిద్ధు జొన్నలగడ్డ కొత్త చిత్రానికి పనిచేస్తున్నా.