Vijay Kanakamedala | ఆరు నెలలు పరిశోధన చేశా!

“నిత్యం మనం ఎన్నో మిస్సింగ్‌ కేసుల్ని చూస్తున్నాం. కోర్టులు కూడా ఈ వ్యవహారంలో జోక్యం చేసుకొని నివేదికలు కోరిన సందర్భాలున్నాయి. ఈ అంశంపై పరిశోధన చేసి ‘ఉగ్రం’ చిత్రాన్ని తీశాను’ అన్నారు విజయ్‌ కనకమేడల.

“నిత్యం మనం ఎన్నో మిస్సింగ్‌ కేసుల్ని చూస్తున్నాం. కోర్టులు కూడా ఈ వ్యవహారంలో జోక్యం చేసుకొని నివేదికలు కోరిన సందర్భాలున్నాయి. ఈ అంశంపై పరిశోధన చేసి ‘ఉగ్రం’ చిత్రాన్ని తీశాను’ అన్నారు విజయ్‌ కనకమేడల. ఆయన దర్శకత్వంలో అల్లరి నరేష్‌ కథానాయకుడిగా నటించిన ఈ చిత్రం మే 5న ప్రేక్షకుల ముందుకురానుంది. ఈ సందర్భంగా దర్శకుడు విజయ్‌ కనకమేడల శనివారం పాత్రికేయులతో ముచ్చటించారు.

నరేష్‌ ఇప్పటివరకు విభిన్న కథల్లో నటించినా..రౌద్రరసపూరితమైన కథాంశంతో సినిమా చేయలేదు. ఇది ఆయనకు కొత్తగా ఉంటుందనిపించింది. కథ చెప్పగానే నరేష్‌ వెంటనే ఓకే చేశారు. ఈ కథపై ఆరు నెలల పాటు పరిశోధన చేశాను. ‘ఉగ్రం’ మంచి యాక్షన్‌ థ్రిల్లర్‌. కథలో చాలా కొత్త ఎలిమెంట్స్‌ ఉంటాయి. ఇందులో నరేష్‌ పోలీసాఫీసర్‌గా కనిపిస్తారు. ఈ సినిమా యాక్షన్‌ విషయంలో చాలా శ్రద్ధ తీసుకున్నాం. పోలీస్‌ పాత్రలో పర్‌ఫెక్ట్‌గా కనిపించడానికి నరేష్‌ ఫిజికల్‌ ఫిట్‌నెస్‌పై చాలా శ్రద్ధ తీసుకున్నారు.

సామాజిక అంశాలు ఉండవు

ఈ సినిమా కథానుగుణంగా యాక్షన్‌ ఎపిసోడ్స్‌ ఎక్కువగా ఉంటాయి. అయితే ప్రతీ ఫైట్‌ వెనక ఓ బలమైన కారణం ఉంటుంది. ప్రేక్షకులు ఆ భావోద్వేగాల్ని ఫీలవుతారు. కథలో అధికభాగం రాత్రి వేళల్లో జరుగుతుంది కాబట్టి నైట్‌షూట్స్‌ ఎక్కువ చేశాం. ఈ కథలో సామాజిక అంశాలేవీ ఉండవు. అలాంటి చర్చించడం కూడా నాకు ఇష్టం ఉండదు. కమర్షియల్‌ పంథాలో సాగే యాక్షన్‌ థ్రిల్లర్‌ ఇది. హీరో నరేష్‌ ఇప్పటికే ఆల్‌రౌండర్‌ అని నిరూపించుకున్నాడు. ఈ సినిమా ఆయనలోని యాక్షన్‌ కోణాన్ని ఆవిష్కరిస్తుంది. ప్రస్తుతం నాగచైతన్య కోసం ఓ కథ అనుకుంటున్నా. అదొక మంచి సోషల్‌డ్రామా. మరి కొన్ని కథలు చర్చల దశలో ఉన్నాయి.