Visit:
‘ఈ ఆనందంలో నాకు మాటలు రావడం లేదు. ఈ సినిమా విషయంలో నేను త్రివిక్రమ్‌కు థాంక్స్‌ చెప్పాలి. ఆయన లేకపోతే ఈ ప్రాజెక్ట్‌ లేదు. పవన్‌కల్యాణ్‌తో సినిమా చేద్దామనుకున్నప్పుడు దర్శకుడు సుజిత్‌ పేరును త్రివిక్రమ్‌ సూచించారు. పవన్‌కల్యాణ్‌ అభిమానులకు నచ్చే సినిమా అందించాలనే ఉద్దేశంతో ఎంతో శ్రద్ధతో ఈ సినిమా తీశాం’ అన్నారు నిర్మాత డి.వి.వి.దానయ్య. ఆయన నిర్మాణంలో పవన్‌కల్యాణ్‌ కథానాయకుడిగా సుజిత్‌ దర్శకత్వంలో రూపొందిన ‘ఓజీ’ చిత్రం శుక్రవారం ప్రేక్షకుల ముందుకొచ్చింది. ఈ సందర్భంగా ఏర్పాటు చేసిన సమావేశంలో నిర్మాత డీవీవీ దానయ్య మాట్లాడుతూ పై విధంగా స్పందించారు. ఈ సినిమాకు అద్భుతమైన టీమ్‌ కుదిరిందని, ఈ విజయం తమ ఆనందాన్ని రెట్టింపు చేసిందని ఆయన చెప్పారు. దర్శకుడు సుజిత్‌ మాట్లాడుతూ ‘దాదాపు మూడేళ్ల ప్రయాణమిది.
పవన్‌కల్యాణ్‌ వల్లే ఈ కథకు ఇంతటి భారీతనం వచ్చింది. నేను ఆయన వీరాభిమానిని. ‘జానీ’ టైంలో ఆయన్ని ఓసారి కలిస్తే చాలనుకునేవాడిని. కానీ ఈ రోజు ఆయనతో తీసిన సినిమాకు బ్లాక్‌బస్టర్‌ టాక్‌ రావడం ఆనందంగా ఉంది’ అన్నారు. ఎక్కడ చూసిన ఓజీ హంగామా కనిపిస్తున్నదని, ప్రజలు ఈ సినిమాను బాగా ఓన్‌ చేసుకున్నారని, ఈ విజయంతో భవిష్యత్తులో మరింత బాధ్యతగా పనిచేస్తానని సంగీత దర్శకుడు తమన్‌ పేర్కొన్నారు. ఈ సినిమా పంపిణీలో తాము ఓ భాగమని, ఈ సినిమా చూసిన అభిమానులు 12 ఏళ్ల ఆకలి తీరిందని చెబుతుంటే సంతోషంగా ఉందని నిర్మాత నాగవంశీ అన్నారు.
