రొమాంటిక్‌ ‘రాజా సాబ్‌’

అగ్ర హీరో ప్రభాస్‌ ఇప్పటివరకు హారర్‌ కామెడీ జోనర్‌లో సినిమాలు చేయలేదు. దాంతో మారుతి దర్శకత్వంలో ఆయన నటిస్తున్న తాజా చిత్రం నిర్మాణం నుంచే ప్రేక్షకుల్లో ఆసక్తిని పెంచుతున్నది.

అగ్ర హీరో ప్రభాస్‌ ఇప్పటివరకు హారర్‌ కామెడీ జోనర్‌లో సినిమాలు చేయలేదు. దాంతో మారుతి దర్శకత్వంలో ఆయన నటిస్తున్న తాజా చిత్రం నిర్మాణం నుంచే ప్రేక్షకుల్లో ఆసక్తిని పెంచుతున్నది. ఈ సినిమాకు ‘రాజా సాబ్‌’ అనే టైటిల్‌ను ఖరారు చేశారు. పీపుల్‌ మీడియా ఫ్యాక్టరీ పతాకంపై టీజీ విశ్వప్రసాద్‌ నిర్మిస్తున్నారు. సంక్రాంతి పర్వదినాన్ని పురస్కరించుకొని సోమవారం టైటిల్‌ను ప్రకటించడంతో పాటు ఫస్ట్‌లుక్‌ను విడుదల చేశారు. ఇందులో ప్రభాస్‌ లుంగీ కట్టుకొని వింటేజ్‌ లుక్‌లో దర్శనమిస్తున్నారు. దర్శకుడు మారుతి శైలి వినోదం, ప్రభాస్‌ ఇమేజ్‌కు తగిన యాక్షన్‌, రొమాంటిక్‌ హంగులతో ఈ చిత్రాన్ని తెరకెక్కిస్తున్నట్లు తెలిసింది. ప్రభాస్‌ పాత్ర మునుపెన్నడూ చూడని రీతిలో చక్కటి హాస్యం, రొమాన్స్‌ కలబోతగా ఉంటుందని చెబుతున్నారు. ఈ పాన్‌ ఇండియా చిత్రం ప్రస్తుతం షూటింగ్‌ను జరుపుకుంటున్నది. ఈ సినిమాకు సంబంధించిన మరిన్ని వివరాలను త్వరలో వెల్లడించనున్నారు. ఈ చిత్రానికి సినిమాటోగ్రఫీ: కార్తీక్‌ పళని, సంగీతం: తమన్‌, ప్రొడక్షన్‌ డిజైనర్‌: రాజీవన్‌, క్రియేటివ్‌ ప్రొడ్యూసర్‌: ఎస్‌కేఎన్‌, ఫైట్స్‌: కింగ్‌ సోలొమన్‌, సహనిర్మాత: వివేక్‌ కూచిభొట్ల, రచన-దర్శకత్వం: మారుతి.