Visit:
కెరీర్‌ ప్రారంభంలో ఆనంద్‌, గోదావరి, హ్యాపీడేస్‌ సినిమాలతో దర్శకుడిగా హ్యాట్రిక్‌ కొట్టారు శేఖర్‌ కమ్ముల. మళ్లీ ఇన్నాళ్లకు ఆయనకు హ్యాట్రిక్‌ అవకాశం వచ్చింది. ఫిదా, లవ్‌స్టోరీ చిత్రాల వరుస విజయాలతో మంచి జోష్‌ మీదున్న ఆయన.. త్వరలో ‘కుబేర’తో రాబోతున్నారు. ధనుష్‌ కథానాయకుడిగా రూపొందుతోన్న ఈ చిత్రంలో అక్కినేని నాగార్జున ప్రత్యేకపాత్ర పోషిస్తున్నారు. బ్యాంకాక్‌ షెడ్యూల్‌లో లీకైన ధనుష్‌, నాగార్జున లుక్‌లకు సినిమాపై అంచానాలు పెంచాయి. ఈసారి శేఖర్‌ కమ్ముల హ్యాట్రిక్‌ కొట్టడం పక్కా అంటున్నారు. సునీల్‌ నారంగ్‌, పుస్కుర్‌ రామ్మోహన్‌రావు కలిసి నిర్మిస్తున్న ఈ చిత్రంలో రష్మిక మందన్న కథానాయిక. ప్రస్తుతం ఈ సినిమా షూటింగ్‌ ముంబయ్‌లో జరుగుతున్నది.
12రోజుల పాటు జరిగే ఈ షెడ్యూల్‌లో ధనుష్‌, రష్మిక, ఇతరులతో కూడిన కీలకమైన టాకీపార్ట్‌ను, కొన్ని యాక్షన్ ఎపిసోడ్స్‌ను చిత్రీకరించనున్నట్టు మేకర్స్‌ తెలిపారు. విజువల్‌గా వండర్‌ అనిపించేలా సినిమా ఉంటుందని వారు నమ్మకం వ్యక్తం చేశారు. సున్నితమైన భావోద్వేగాలతో కూడిన కథల్ని తెరకెక్కించే శేఖర్‌ కమ్ముల.. ఈ సారి ప్రేక్షకులు ఆశ్చర్యపోయే కొత్త కంటెంట్‌తో రానున్నారనీ, పూర్తి కమర్షియల్‌ హంగులతో రూపొందుతోన్న ఈ సినిమా ఓ కొత్త అనుభూతిని పంచుతుందని మేకర్స్‌ తెలిపారు. జిమ్‌ సర్భ్‌ కీలక పాత్ర పోషిస్తున్న ఈ చిత్రానికి కెమెరా: నికేత్‌ బొమ్మి, సంగీతం: దేవిశ్రీ ప్రసాద్‌, నిర్మాణం: శ్రీ వెంకటేశ్వర సినిమాస్‌ ఎల్‌.ఎల్‌.పి, అమిగోస్‌ క్రియేషన్స్‌ ప్రై.లిమిటెడ్‌, సమర్పణ: సోనాలి నారంగ్‌.
