విమర్శలే తనను మరింత శక్తిమంతంగా మార్చాయని అంటున్నది అందాల నాయిక అనుపమా పరమేశ్వరన్. ప్రతికూల పరిస్థితులను ఎదుర్కొనే మానసిక సన్నద్ధత తనను నటిగా, ఒక యువతిగా బలంగా తయారుచేసిందని ఆమె చెబుతున్నది. ‘రాక్షసుడు’ చిత్రంతో మళ్లీ విజయాల బాట పట్టిన ఈ భామ..ఇటీవల ‘కార్తికేయ 2’ చిత్రంతో మంచి సక్సెస్ అందుకుని ఫామ్లోకి వచ్చింది. ప్రస్తుతం ‘18 పేజీస్’ సినిమాతో ప్రేక్షకులను పలకరించేందుకు సిద్ధమవుతోంది. తాజాగా అనుపమా మాట్లాడుతూ…‘మిగతా సెలబ్రిటీల్లాగే నేనూ మొదట్లో ట్రోలింగ్స్ ఎదుర్కొన్నా.
శరీరాకృతి, సినిమాల ఎంపిక వంటి అంశాల్లో విమర్శలు చేసేవారు. మొదట్లో కుంగిపోయినా ఆ తర్వాత వీటికి భయపడితే ముందడుగు వేయలేమని నిర్ణయించుకున్నా. మానసికంగా బలంగా తయారయ్యా. మానసికంగా బాగుండటం శారీరకంగా ప్రతిబింబిస్తుంది. మనలోని సానుకూల ధోరణి మంచి జరిగేలా చేస్తుంది. మనల్ని మనం నమ్ముకుంటే ఫలితాలు ఆశ్చర్యపరుస్తాయి.’ అని చెప్పింది. అనుపమా ఖాతాలో ‘బటర్ ఫ్లై’ అనే మరో చిత్రమూ ఉంది.