Visit:
Chiranjeevi | మెగాస్టార్ చిరంజీవి సినిమాలతోనే కాకుండా థియేటర్ వ్యాపారంలోనూ అడుగులు వేస్తున్న విషయం తెలిసిందే. ఆసియన్ సినిమాస్తో కలిసి హైదరాబాద్లో భారీ స్థాయిలో మల్టీప్లెక్స్ నిర్మాణానికి ఆయన భాగస్వామ్యం కావడం ఇప్పటికే సినీ వర్గాల్లో ఆసక్తిని పెంచింది. ముఖ్యంగా ప్రపంచంలోనే అతిపెద్ద తెరను హైదరాబాద్లో ఏర్పాటు చేయబోతున్నారనే వార్త బయటకు వచ్చినప్పటి నుంచి నగరంలోని సినీ అభిమానుల్లో దీనిపై ప్రత్యేక ఆసక్తి నెలకొంది. ఫైనాన్షియల్ డిస్ట్రిక్ట్లో నిర్మించనున్న ఈ భారీ మల్టీప్లెక్స్ ప్రాజెక్టు పూర్తయ్యేందుకు కొంత సమయం పట్టే అవకాశం ఉండటంతో.. ఈలోగా హైదరాబాద్లో మరో మల్టీప్లెక్స్ను అందుబాటులోకి తీసుకురావాలని ఆసియన్ సినిమాస్, చిరంజీవి నిర్ణయించినట్లు తాజా సమాచారం. ఈ కొత్త మల్టీప్లెక్స్కు ‘ఆసియన్ మెగాస్టార్ సినీప్లెక్స్’ అనే పేరు పెట్టనున్నట్లు ప్రచారం జరుగుతోంది.
సంక్రాంతి 2027 సందర్భంగా ఈ కొత్త మల్టీప్లెక్స్ను ప్రారంభించేందుకు సన్నాహాలు జరుగుతున్నట్లు తెలుస్తోంది. దీనిపై అధికారిక ప్రకటన రావాల్సి ఉన్నప్పటికీ.. ఈ వార్త ప్రస్తుతం సినీ వర్గాల్లో ఆసక్తికరంగా మారింది..తాజా సమాచారం ప్రకారం హైదరాబాద్లోని కుషాయిగూడ ప్రాంతంలో ఉన్న టల్లూరి థియేటర్లను ఆసియన్ సినిమాస్, చిరంజీవి భాగస్వామ్యం తీసుకున్నట్లు తెలుస్తోంది. ఇప్పటికే ఉన్న థియేటర్లను ఆధునిక హంగులతో పునరుద్ధరించి, కొత్త రూపంలో ప్రేక్షకులకు అందుబాటులోకి తీసుకురావడానికి ఏర్పాట్లు జరుగుతున్నట్లు సమాచారం.పాత థియేటర్లను పూర్తిగా ఆధునీకరించి మల్టీప్లెక్స్ తరహాలో మార్చడం, ప్రేక్షకులకు మెరుగైన ధ్వని, చిత్ర ప్రదర్శన అనుభూతిని అందించేలా సాంకేతిక మార్పులు చేయడం వంటి పనులు చేపడుతున్నట్లు ప్రచారం జరుగుతోంది. అయితే ఇందులో ఎన్ని తెరలు ఉంటాయి, సీటింగ్ సామర్థ్యం ఎంత, ఏయే సాంకేతిక సదుపాయాలు అందుబాటులోకి వస్తాయి వంటి వివరాలు ఇంకా పూర్తిగా వెల్లడికాలేదు.
ఇదిలా ఉంటే ఫైనాన్షియల్ డిస్ట్రిక్ట్లో నిర్మించనున్న భారీ మల్టీప్లెక్స్పై కూడా అంచనాలు కొనసాగుతున్నాయి. ఆసియన్ సినిమాస్తో కలిసి చిరంజీవి ఈ ప్రాజెక్టులో భాగస్వామ్యం కావడంతో దీనికి ప్రత్యేకమైన ప్రాధాన్యత ఏర్పడింది. ప్రపంచంలోనే అతిపెద్ద తెరను ఏర్పాటు చేయాలనే ఆలోచనతో ఈ ప్రాజెక్టును రూపొందిస్తున్నట్లు గతంలో వార్తలు వచ్చాయి. అలాంటి భారీ ప్రాజెక్టు నిర్మాణానికి సహజంగానే ఎక్కువ సమయం అవసరం కావడంతో.. కుషాయిగూడలోని థియేటర్లను ఆధునీకరించి ముందుగా మరో మల్టీప్లెక్స్ను ప్రారంభించాలనే ఆలోచన చేసినట్లు తెలుస్తోంది. దీంతో హైదరాబాద్లో చిరంజీవి పేరు మీద మరో సినిమా వేదిక అందుబాటులోకి రానుందనే ప్రచారం అభిమానుల్లో ఆసక్తిని పెంచుతోంది.చిరంజీవి అభిమానులతో పాటు హైదరాబాద్లోని సినీ ప్రేక్షకులు ఈ కొత్త మల్టీప్లెక్స్ కోసం ఆసక్తిగా ఎదురుచూస్తున్నారు.
