Unstoppable | ఆహా షో కోసం బాలయ్య అబ్బా అనిపించే రెమ్యునరేషన్..

October 15, 2021 / 07:56 PM IST

Aha | Nandamuri balakirshna | NBK | unstoppable | Allu aravind

Balakrishna Unstoppable | బాలయ్య టాక్ షో చేయడం అనేది అద్భుతం.. అద్వితీయం.. అమోఘం అంటూ మురిసిపోతున్నారు అభిమానులు. ఎందుకంటే బాలయ్య గురించి తెలిసిన వాళ్లెవరైనా ఇదే అనుకుంటారు. టాక్ షోకు రావడానికే ఆలోచించే బాలయ్య.. ఎలా టాక్ షోకు హోస్ట్ అయ్యాడబ్బా అంటూ అంతా ఆరా తీస్తున్నారు.. మరోవైపు ఆశ్చర్యపోతున్నారు. ఏదేమైనా అల్లు అరవింద్ మాత్రం మామూలోడు కాదబ్బా.. బాల‌కృష్ణ‌ ను యాంకరింగ్ చేయడానికి ఒప్పించడం ఏంటి సామీ అంటూ ముక్కున వేలేసుకుంటున్నారు. ఇది నిజంగా అరాచకమే.. బాలయ్య యాంకరింగ్ చూడ్డానికి మేం సిద్దం అంటూ సోషల్ మీడియాలో ట్రెండింగ్ అవుతుంది ఆయన అన్‌స్టాపబుల్‌ షో. ఈ షో గురించి ఇలా చెప్పారో లేదో అప్పుడే ఫ్యాన్స్ ఆసక్తిగా వేచి చూడటం మొదలు పెట్టారు.

నవంబర్ 4 నుంచి ఆహలో టెలికాస్ట్ కానుంది అన్‌స్టాపబుల్‌ షో. ఈ షో లాంచ్ వేడుకలో బాల‌కృష్ణ‌ మాట్లాడుతూ నవ్వించారు కూడా. పొట్టివాళ్లు గట్టివాళ్లు అంటూ అల్లు అరవింద్ ను ఆట పట్టించాడు కూడా. తన తండ్రితో ఇండస్ట్రీలో ఎవరికీ లేని చనువు కేవలం అల్లు రామలింగయ్యకు మాత్రమే ఉండేదని.. ఎన్టీఆర్ ను బండోడు అనే వాడని గుర్తు చేసుకున్నారు. అల్లు కుటుంబంతో తమకు విడదీయరాని అనుబంధం ఉందని గుర్తు చేసుకున్నాడు బాలయ్య. ఈ సందర్భంగా అల్లు అరవింద్ బాలకృష్ణ గురించి మాట్లాడుతూ బాలకృష్ణ గొప్ప మనిషి.. కేవలం సినిమాలోనే నటిస్తాడు.. బయట నటించడం రాదని చెప్పాడు. కోపం వచ్చినా సంతోషం వచ్చినా నటించకుండా రియల్ ఎమోషన్స్ చూపించే మనిషి అన్నాడు. అలాంటి వ్యక్తి హోస్ట్ గా ఉంటే ఎలా ఉంటుందో ఊహించుకోండని చెప్పాడు అల్లు అరవింద్.

ఇదిలా ఉంటే ఈ అన్‌స్టాప‌బుల్‌ షో కోసం బాలయ్య భారీ పారితోషికమే అందుకుంటున్నాడు. ఇంకా చెప్పాలంటే సినిమా కంటే ఎక్కువగా దీనికే పారితోషికం అందుకుంటున్నాడని తెలుస్తుంది. బాలయ్యతో యాంకరింగ్ అంటే మామూలు విషయం కాదు. దానికి భారీగానే ఖర్చు చేయాల్సిందే. అల్లు అరవింద్ అండ్ ఆహా టీం కూడా ఇదే చేశారు. ఒక్కో ఎపిసోడ్ కు ఏకంగా 40 లక్షల వరకు పారితోషికం అందుకుంటున్నట్లు తెలుస్తుంది. 12 ఎపిసోడ్స్‌తో తొలి సీజన్ ముగుస్తుందని ప్రచారం జరుగుతుంది. అంటే ఈ లెక్కన దాదాపు 6 కోట్ల వరకు అందుకుంటున్నాడు బాలయ్య. మరి ఈ షో ఎంతవరకు ఆకట్టుకుంటుందో చూడాలి.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి