Dear Megha | బ్యాక్‌గ్రౌండ్‌ లేకపోవడం మైనస్‌ అయ్యింది

‘నేను ఇమేజ్‌ గురించి పట్టించుకోను. కథ నచ్చితే ఏ క్యారెక్టర్‌ అయినా చేయడానికి సిద్ధమే’ అనిఅన్నారు అరుణ్‌ అదిత్‌. ఆయన హీరోగా నటించిన చిత్రం ‘డియర్‌ మేఘ’. సుశాంత్‌రెడ్డి దర్శకుడు. అర్జున్‌ దాస్యన్‌ నిర్మించారు. సెప్టెంబర్‌ 3న ఈ చిత్రం విడుదలవుతోంది. ఈ సందర్భంగా అదివారం హైదరాబాద్‌లో అరుణ్‌ అదిత్‌ పాత్రికేయులతో ముచ్చటిస్తూ ‘దర్శకుడు సుశాంత్‌తో నాకు పదేళ్లుగా పరిచయముంది. తనకు యాక్షన్‌ సినిమాలంటే చాలా ఇష్టం. తన శైలికి భిన్నంగా ఫీల్‌గుడ్‌ లవ్‌స్టోరీతో ఈ సినిమా చేశారు. సాధారణంగా సినిమాల్లో ప్రేమకథలన్నీ కథానాయకుడి ధృక్కోణం నుంచే సాగుతాయి. అందుకు భిన్నంగా నాయిక ప్రధానంగా సాగే చిత్రమిది. ఓ అబ్బాయితో ప్రేమలో పడిన అమ్మాయి కథ ఇది. ఆమె జీవితంలోకి మరో యువకుడు ఎలా వచ్చాడన్నది ఆసక్తికరంగా ఉంటుంది. సుదీర్ఘకాలం పాటు ఇండస్ట్రీలో నిలదొక్కుకోవడం ఆనందంగా ఉంది. బ్యాక్‌గ్రౌండ్‌ లేకపోవడం నటుడిగా నాకు మైనస్‌ అయ్యింది. ఆ కారణం వల్లే ఇప్పటికీ సమస్యలు ఎదుర్కొంటూనే ఉన్నా. దేవుడిచ్చిన కళను నమ్ముకుంటూ ఉన్నదానితో సంతృప్తిపడాలని ఈ ప్రయాణంలో అర్థంచేసుకున్నా. ప్రతి రంగంలో బ్యాక్‌గ్రౌండ్‌ పరమైన సమస్యలుంటాయి. ప్రస్తుతం ‘డబ్ల్యుడబ్ల్యుడబ్ల్యు’ ‘కథ కంచికి మనం ఇంటికి’తో పాటు అమలాపాల్‌ నిర్మాణంలో ఓ సినిమా చేస్తున్నా’ అని తెలిపారు.