ప్రేమ, పెళ్లి విషయాల్లో సుందరానికి నిర్ధిష్టమైన అభిప్రాయాలుంటాయి. జీవితాన్ని ఏమాత్రం సీరియస్గా తీసుకోకుండా సరదాగా గడపటం అతని నైజం. ప్రేమకు ఆమడ దూరంలో ఉండే సుందరం జీవితంలోకి అనుకోకుండా ఓ అమ్మాయి ప్రవేశిస్తుంది. ఆ తర్వాత ఏం జరిగిందన్నదే మా సినిమా కథ’ అన్నారు వివేక్ ఆత్రేయ. ఆయన దర్శకత్వంలో నాని, నజ్రియా ఫహద్ జంటగా నటిస్తున్న చిత్రం ‘అంటే సుందరానికీ’. నవీన్ యెర్నేని, రవిశంకర్. వై నిర్మాతలు. జూన్ 10న తెలుగు, తమిళ, మలయాళ భాషల్లో ప్రేక్షకుల ముందుకురానుంది.
ఈ సినిమాలోని మూడో గీతం ‘రంగో రంగా’ సోమవారం విడుదలైంది. ‘అనుకున్నదోటి..అయ్యిందోటి..రంగో రంగా..మొక్కిందోటి..దక్కిందోటి రంగో రంగా..’ అంటూ వినోదాత్మకంగా ఈ గీతం సాగింది. సుందరం పాత్ర నైజాన్ని ఆవిష్కరిస్తూ ఈ పాటకు రూపకల్పన చేశారు. శనపతి భరద్వాజ్ సాహిత్యాన్ని అందించిన ఈ గీతాన్ని కారుణ్య ఆలపించారు. ‘ఆద్యంతం హాస్యప్రధానంగా సాగే చిత్రమిది.
టీజర్కు మంచి స్పందన లభిస్తున్నది’ అని చిత్రబృందం పేర్కొంది. నదియా, హర్షవర్ధన్, రాహుల్ రామకృష్ణ, సుహాస్ తదితరులు నటిస్తున్న ఈ చిత్రానికి కెమెరా: నికేత్ బొమ్మి, సంగీతం: వివేక్ సాగర్, నిర్మాణ సంస్థ: మైత్రీ మూవీ మేకర్స్, సీఈఓ: చెర్రీ, రచన-దర్శకత్వం: వివేక్ ఆత్రేయ.