Sreeleela | వరుస విజయాలతో టాలీవుడ్లో దూసుకుపోతున్నది అందాల తార శ్రీలీల. ఒక్కో క్రేజీ ప్రాజెక్ట్నూ దక్కించుకుంటూ మిగతా తారలకు అందనంత ఎదుగుతున్నదీ నవనాయిక. అందంతో ఆకర్షించడమే కాదు సేవా కార్యక్రమాలు చేస్తూ తన మంచి మనసు చాటుతున్నది. తాజాగా ఓ అనాథశ్రమాన్ని సందర్శించిన శ్రీలీల..అక్కడి పిల్లలతో రోజంతా సరదాగా గడిపింది. ఆడిపాడి వారిని ఉత్సాహపరిచింది.
ఈ ఫొటోలను సోషల్ మీడియా ద్వారా పంచుకున్న శ్రీలీల స్పందిస్తూ…‘ఈ పిల్లల్లో ఎన్ని ఆశలు, ఎన్నెన్ని ఆకాంక్షలు, ఎంత ప్రతిభ దాగి ఉందో వారిని కలిసే వరకు తెలియలేదు. వారి నవ్వులతో నా మనసు నిండిపోయింది. మీరూ ఇలాంటి అనుభూతిని పొందాలని కోరుతున్నా. నెలకో, వారానికో ఒక్కసారి సేవా కార్యక్రమంలో పాల్గొనండి. వారికి నేనున్నా అని చెప్పండి. అనాథ పిల్లలను కలిసిన ఫొటోలను ‘హియర్ ఫర్ యూ’ అనే హ్యాష్ట్యాగ్ ద్వారా నాతో షేర్ చేసుకోండి. మీరు పంపే ఫొటోలను చూసేందుకు ఎదురుచూస్తుంటా’ అని పేర్కొంది. ఇటీవల ‘ధమాకా’ చిత్రంతో ఘన విజయాన్ని అందుకున్న శ్రీలీల ఆ చిత్రంలో ఆమె చేసిన నృత్యాలతో యువ ప్రేక్షకుల్ని ఆకర్షించింది. ప్రస్తుతం ఆమె ఖాతాలో మహేష్ బాబు, రామ్ కొత్త చిత్రాలతో పాటు మరికొన్ని క్రేజీ ప్రాజెక్టులున్నాయి.