Kriti Sanon | ఎవ‌రో చెప్పార‌ని మార‌డానికి నేనేమైనా ప్లాస్టిక్ బొమ్మ‌నా.. ప్ర‌భాస్ హీరోయిన్ సీరియ‌స్‌

January 21, 2022 / 10:30 PM IST

Kriti Sanon | ‘దారిన పోయే దానయ్యలు ఏవో చెబుతుంటారు. ప్రతి విషయాన్ని పట్టించుకుంటే కెరీర్‌లో ముందుకుసాగలేం. మనదైన సొంత వ్యక్తిత్వంతో అవరోధాలన్నింటిని అధిగమించాలి’ అని సలహా ఇచ్చింది బాలీవుడ్‌ భామ కృతిసనన్‌. చిత్రసీమలో కథానాయికలు తరచుగా ఎదుర్కొనే బాడీషేమింగ్‌ (శారీరక రూపహేళన) గురించి మాట్లాడుతూ ఆమె పై విధంగా స్పందించింది. కెరీర్‌ తొలినాళ్లలో తాను బాడీషేమింగ్‌ తాలూకు అవమానాల్ని ఎదుర్కొన్నానని చెప్పింది.

కృతిసనన్‌ మాట్లాడుతూ ‘నా పెదవులు చిన్నగా ఉన్నాయి కాబట్టి ఎక్కువ మొత్తం లిప్‌స్టిక్‌ రాసి కవర్‌ చేయాలని చెప్పేవారు. అలాగే నవ్వుతుంటే ముక్కుపుటలు బాగా పైకి వస్తున్నాయి… పెద్దగా నవ్వొద్దు అంటూ సలహాలిచ్చేవారు. నడుము సైజ్‌ బాగా తగ్గించుకోవాలని ఎప్పుడూ చెబుతుండేవారు. ఇలాంటి అవమానాలు నాలో కసిని పెంచాయి. లోపాలపై కాకుండా నా బలాలపై దృష్టిపెట్టా. మంచి కథల్ని ఎంచుకొని నటిగా నిరూపించుకున్నా. తమ మనోభీష్టానికి వ్యతిరేకంగా శారీరక రూపాన్ని మార్చుకోవడానికి ఆడవాళ్లు ప్లాస్టిక్‌ బొమ్మలు కాదు. అందుకే ఇలాంటి మాటల గురించి ఏమాత్రం పట్టించుకోవద్దు. ఎప్పటికైనా మన ప్రతిభే గెలిపిస్తుంది’ అని చెప్పింది. ‘మిమి’ చిత్రంతో విమర్శకుల ప్రశంసలందుకొన్న ఈ సొగసరి ప్రస్తుతం ప్రభాస్‌ సరసన పాన్‌ఇండియా చిత్రం ‘ఆదిపురుష్‌’లో కథానాయికగా నటిస్తున్నది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి