Whole Sale Inflation | పైపైకి ఆహార వస్తువుల ధరలు.. తొమ్మిది నెలల గరిష్టానికి డిసెంబర్ టోకు ద్రవ్యోల్బణం..!

Whole Sale Inflation | ఆహార వస్తువుల ధరలు పైపైకి పెరిగిపోతున్నాయి. ఫలితంగా నవంబర్‌తో పోలిస్తే డిసెంబర్ టోకు ధరల సూచీ (డబ్ల్యూ‌పీఐ).. హోల్‌సేల్ ద్రవ్యోల్బణం 0.73శాతం పెరిగింది.

Whole Sale Inflation | ఆహార వస్తువుల ధరలు పైపైకి పెరిగిపోతున్నాయి. ఫలితంగా నవంబర్‌తో పోలిస్తే డిసెంబర్ టోకు ధరల సూచీ (డబ్ల్యూ‌పీఐ).. హోల్‌సేల్ ద్రవ్యోల్బణం 0.73శాతం పెరిగింది. నవంబర్ టోకు ద్రవ్యోల్బణం 0.26 శాతంగా నమోదైంది. గతేడాది మార్చిలో 1.34 శాతంగా నమోదైన టోకు ద్రవ్యోల్బణం.. ఏప్రిల్‌లో -0.92 శాతానికి పతనమైంది. కానీ, ఏడు నెలల తర్వాత నవంబర్ నెలలో 0.26 శాతం ద్రవ్యోల్బణం రికార్డయింది. ఏప్రిల్ తర్వాత దాదాపు అదే స్థాయిలో డిసెంబర్ టోకు ద్రవ్యోల్బణం పెరిగింది.

కానీ నవంబర్ నాటికి ఆహార ద్రవ్యోల్బణం పెరగడంతో టోకు ద్రవ్యోల్బణం పైపైకి దూసుకెళ్లింది. ఏప్రిల్‌లో నెగెటివ్ జోన్‌లోకి పడిపోయిన హోల్‌సేల్ ద్రవ్యోల్బణం.. అక్టోబర్, నవంబర్ నెలల్లో పుంజుకున్నది. ఆహార వస్తువులు, మెషినరీ అండ్ ఎక్విప్‌మెంట్, మాన్యుఫాక్చరింగ్, రవాణా వస్తువులు, కంప్యూటర్, ఎలక్ట్రానిక్స్, ఆప్టికల్ ఉత్పత్తుల ధరలు పెరిగాయని కేంద్ర వాణిజ్య, పరిశ్రమల మంత్రిత్వ శాఖ ఓ ప్రకటనలో తెలిపింది.

నవంబర్‌లో ఆహార ద్రవ్యోల్బణం 8.18 శాతం నమోదు కాగా, డిసెంబర్ నెలలో 9.38 శాతానికి పెరిగింది. కూరగాయల ధరలు 26.30 శాతం, పప్పు ధాన్యాలు 19.60 శాతం పెరిగాయి. మరోవైపు డిసెంబర్ రిటైల్ ద్రవ్యో్ల్బణం నాలుగు నెలల గరిష్ట స్థాయి 5.69 శాతానికి దూసుకెళ్లింది. నవంబర్, డిసెంబర్ నెలల్లో ఆహార ధరల పెరుగుదల నేపథ్యంలో గత నెలలో ద్రవ్య పరపతి సమీక్ష జరిపిన ఆర్బీఐ.. కీలక వడ్డీరేట్లు యధాతథంగా కొనసాగించింది.

గత ఏప్రిల్‌లో బేసిక్ మెటల్స్, ఫుడ్ ప్రొడక్ట్స్, మినరల్ ఆయిల్స్, టెక్స్‌టైల్స్, నాన్ ఫుడ్ ఆర్టికల్స్, కెమికల్ అండ్ కెమికల్ ప్రొడక్ట్స్, రబ్బర్ అండ్ ప్లాస్టిక్ ఉత్పత్తులు, పేపర్ అండ్ పేపర్ ప్రొడక్ట్స్ ధరలు తగ్గాయి. ఫలితంగా ఏప్రిల్ టోకు ద్రవ్యోల్బణం భారీగా తగ్గింది.