WhatsApp | డీప్ ఫేక్ గుర్తించేందుకు వాట్సాప్ హెల్ప్ లైన్ ఇలా..!

WhatsApp | డీప్ ఫేక్‌`ను గుర్తించ‌డానికి మెటా అనుబంధ సంస్థ ఆర్టిఫిషియ‌ల్ ఇంటెలిజెన్స్ (ఏఐ) బేస్డ్ చాట్‌బోట్‌తో కూడిన హెల్ప్‌లైన్ అందుబాటులోకి తేనున్న‌ది.

WhatsApp | అత్యాధునిక టెక్నాలజీ.. ప్రత్యేకించి ఆర్టిఫిషియల్ ఇంటెలిజెన్స్ (ఏఐ) బేస్డ్ డీప్ ఫేక్స్, వాయిస్ రికార్డులు వస్తుండటంతో సామాన్యుల నుంచి ప్రముఖుల వరకూ వాటి భారీన పడుతున్నారు. ఈ పరిస్థితుల్లో వాట్సాప్ పేరెంట్ సంస్థ మెటా ఇందుకోసం స్పెషల్ హెల్ప్ లైన్ ఏర్పాటు ఏర్పాటు చేయనున్నది. ఇంగ్లిష్‌తోపాటు చాట్ బోట్ ఫామ్‌లో వాట్సాప్ హెల్ప్‌లైన్ మూడు భాషలతో (హిందీ, తమిళం, తెలుగు) ఉంటుంది. ఈ హెల్ప్ లైన్ నంబర్‌కు చాట్ బోట్ ద్వారా యూజర్లు టెక్ట్స్, ఇమేజ్, వీడియో మెసేస్ లపై దర్యాప్తు కోసం పంపొచ్చు. ఇందుకోసం మిస్ ఇన్ఫర్మేషన్ కంబాట్ అలయెన్స్ (ఎంసీఏ)తో భాగస్వామ్యం అవుతున్నామని మెటా తెలిపింది. వచ్చే నెల నుంచి ప్రజలకు ఈ హెల్ప్ లైన్ వినియోగంలోకి వస్తుంది.

మెటా పబ్లిక్ పాలసీ డైరెక్టర్ శివనాథ్ థుక్రాల్ మాట్లాడుతూ ప్రజలకు వచ్చే తప్పుడు సమాచారాన్ని ఏఐ ద్వారా గుర్తించవచ్చునన్నారు. ఇందుకు యావత్ టెక్నాలజీ పరిశ్రమ స్పష్టమైన, తప్పనిసరి చర్యలు తీసుకోవాల్సిన అవసరం ఉందన్నారు. ఎంసీఏ చైర్మన్ భారత్ గుప్తా మాట్లాడుతూ భారత్ లోని ఇంటర్నెట్ యూజర్లు, సోషల్ మీడియా యూజర్లకు వచ్చే తప్పుడు సమాచారం విస్తరించకుండా తప్పనిసరి చర్యలు తీసుకోవాల్సి ఉందన్నారు. సోషల్ మీడియా ప్లాట్ ఫామ్స్ కూడా తమ యూజర్లు ఎటువంటి `తప్పుడు సమాచారం లేదా డీప్ ఫేక్స్’ పోస్ట్ చేయకుండా చట్టబద్ధమైన బాధ్యత కలిగి ఉండాలని కేంద్ర ఐటీ అండ్ ఎలక్ట్రానిక్స్ శాఖ సహాయ మంత్రి రాజీవ్ చంద్రశేఖర్ చెప్పారు.