హెచ్‌సీఎల్‌తో టీ-హబ్‌ జట్టు

• టెక్నాలజీ స్టార్టప్స్‌కు ఊతమిచ్చేందుకు భాగస్వామ్యం

హైదరాబాద్‌, ఆగస్టు 5 (నమస్తే తెలంగాణ): క్వాంటమ్‌ కంప్యూటింగ్‌, డీప్‌ టెక్‌ వంటి ఎమర్జింగ్‌ టెక్నాలజీ స్టార్టప్స్‌కు ఊతమివ్వడానికి హెచ్‌సీఎల్‌ టెక్నాలజీస్‌తో తెలంగాణ స్టార్టప్‌ ఎకోసిస్టం బిల్డర్‌ టి-హబ్‌ భాగస్వామైంది. వివిధ దశల్లో సహకారం అందించేందుకు ఇఎస్‌టిప్‌-హెచ్‌సీఎల్స్‌ కార్యక్రమంతో స్టార్టప్స్‌ని టి-హబ్‌ అనుసంధానించనున్నది. ఈ భాగస్వామ్యం ద్వారా హెచ్‌సీఎల్‌ వినియోగదారులు, భాగస్వాములు అనుసరించే విధానాల సామర్థ్యాలను పెంచడంతోపాటు స్టార్టప్స్‌ వృద్ధి అవకాశాలు పెరుగుతాయని ఈ సందర్భంగా గురువారం టి-హబ్‌ సీఈవో రవి నారాయణ్‌ అన్నారు. టి-హబ్‌తో ఈ ఒప్పందం ఆవిష్కరణలను ప్రోత్సహించేందుకు ఎంతగానో ఉపయోగపడుతుందని, ముఖ్యంగా క్వాంటమ్‌ కంప్యూటింగ్‌ ఆధారిత ఆవిష్కరణల పెరుగుదలకు దోహదం చేస్తుందని హెచ్‌సీఎల్‌ టెక్నాలజీస్‌ చీఫ్‌ టెక్నాలజీ ఆఫీసర్‌ అండ్‌ హెడ్‌ కళ్యాణ్‌ కుమార్‌ అన్నారు.