Suniel Shetty | స్విగ్గీ, జొమాటోల‌కు దీటైన పోటీ : ఫుడ్ డెలివ‌రీ యాప్‌ను ప్రారంభించిన సునీల్ శెట్టి

బాలీవుడ్ హీరో సునీల్ శెట్టి (Suniel Shetty) బ్రాండ్ అంబాసిడ‌ర్‌గా వాయు పేరుతో మ‌రో ఫుడ్ డెలివ‌రీ యాప్ ప్రారంభ‌మైంది.

ముంబై : బాలీవుడ్ హీరో సునీల్ శెట్టి (Suniel Shetty) బ్రాండ్ అంబాసిడ‌ర్‌గా వాయు పేరుతో మ‌రో ఫుడ్ డెలివ‌రీ యాప్ ప్రారంభ‌మైంది. ఇత‌ర ఫుడ్ డెలివ‌రీ యాప్‌ల‌తో పోలిస్తే 15 నుంచి 20 శాతం త‌క్కువ ధ‌ర‌లో వాయు సేవ‌లందిస్తుంద‌ని కంపెనీ పేర్కొంది. ఈ యాప్‌తో ముంబై హోట‌ళ్లు త‌మ సొంత ఆన్‌లైన్ ఫుడ్ డెలివ‌రీ యాప్‌ను క‌స్ట‌మ‌ర్ల ముందుకు తీసుకువ‌చ్చారు.

ముంబై హోట‌ల్ అండ్ రెస్టారెంట్ అసోసియేష‌న్ (ఆహార్‌) స‌హ‌కారంతో టెక్ ఎంట్ర‌ప్రెన్యూర్లు అనిరుధ కోట్గిర్‌, మంద‌ర్ లండే నేతృత్వంలోని డెస్టెక్ హొరెకా వాయు యాప్‌ను లాంఛ్ చేసింది. ఈ యాప్‌న‌కు సునీల్ శెట్టిని బ్రాండ్ అంబాసిడ‌ర్‌గా కంపెనీ నియ‌మించింది. ఈ యాప్ క‌స్ట‌మ‌ర్ల‌ను భ‌గ‌త్ తారాచంద్‌, మ‌హేష్ లంచ్ హోం, బ‌నానా లీఫ్‌, శివ‌సాగ‌ర్‌, గురు కృప‌, కృతి మ‌హ‌ల్‌, పెర్షియ‌న్ ద‌ర్బార్‌, ల‌డు సామ్రాట్ వంటి వేయికి పైగా ముంబై రెస్టారెంట్ల‌తో క‌నెక్ట్ చేస్తుంది.

రెస్టారెంట్ల నుంచి వాయు ఎలాంటి క‌మీష‌న్‌, ఫీజును వ‌సూలు చేయ‌ద‌ని, క‌స్ట‌మ‌ర్ల‌కు మెరుగైన నాణ్య‌త‌తో, త‌క్కువ ధ‌ర‌ల‌కే సేవ‌ల‌ను అందిస్తుంద‌ని కంపెనీ నిర్వాహ‌కులు తెలిపారు. అధిక ధ‌ర‌లు, స‌ర్వీసులో జాప్యం, క‌స్ట‌మ‌ర్ సపోర్ట్ కొర‌వ‌డ‌టం వంటి స‌మ‌స్య‌ల నుంచి క‌స్టమ‌ర్ల‌కు ఉప‌శ‌మ‌నం క‌ల్పిస్తూ మెరుగైన సేవ‌లు అందిస్తుంద‌ని చెప్పారు.

Read More

Viral video | మెట్రో రైల్లో బరితెగించిన యువ జంట.. అందరూ చూస్తుండగానే ముద్దుల్లో మునక