Retail Inflation | ఏడాది క‌నిష్ట స్థాయికి డిసెంబర్ రిటైల్ ద్ర‌వ్యోల్బ‌ణం.. కానీ.. !

Retail Inflation | డిసెంబర్ రిటైల్ ద్రవ్యోల్బణం ఏడాది కనిష్ట స్థాయి 5.72 శాతంగా నమోదైంది.

Retail Inflation | ఆహార వ‌స్తువుల ధ‌ర‌లు త‌గ్గ‌డంతో డిసెంబ‌ర్ రిటైల్ ద్ర‌వ్యోల్బ‌ణం ఏడాది క‌నిష్ట స్థాయికి దిగి వ‌చ్చింది. గ‌త నెల చిల్ల‌ర ద్ర‌వ్యోల్బ‌ణం 5.72 శాతంగా న‌మోదైంది. ఆర్బీఐ నియంత్ర‌ణ స్థాయి 4 (+/-2_ ) కంటే రిటైల్ ద్ర‌వ్యోల్బ‌ణం త‌క్కువగా న‌మోదు కావ‌డం వ‌రుస‌గా రెండో నెల‌. భార‌త క‌న్జూమ‌ర్ ప్రైస్ ఇండెక్స్ (సీపీఐ) బాస్కెట్‌లో 46 శాతంగా ఉన్న ఆహారం, శీత‌ల పానీయాల ధ‌ర‌లు ప‌త‌నం కావ‌డంతో చిల్ల‌ర ద్ర‌వ్యోల్బ‌ణం దిగి వ‌చ్చింది. గ‌త అక్టోబ‌ర్‌లో రిటైల్ ద్ర‌వ్యోల్బ‌ణం 6.77 శాతం కాగా, న‌వంబ‌ర్‌లో 5.88 శాతానికి దిగొచ్చింది. న‌వంబ‌ర్ రిటైల్ ద్ర‌వ్యోల్బ‌ణం 11 నెల‌ల క‌నిష్ట స్థాయి. అయితే డిసెంబ‌ర్ నెల‌లో గ్రామీణ ప్రాంతాల్లో రిటైల్ ద్ర‌వ్యోల్బ‌ణం 6.05 శాతం, ప‌ట్ట‌ణ ప్రాంతాల్లో 5.39 శాతంగా న‌మోదైంది.

ఆహార ద్ర‌వ్యోల్బ‌ణం డిసెంబ‌ర్‌లో 4.19 శాతం అయితే, న‌వంబ‌ర్‌లో 4.67 శాతంగా న‌మోదైంది. సీపీఐలో ఆహార ద్ర‌వ్యోల్బ‌నం వాటా దాదాపు 40 శాతం. కూర‌గాయ‌ల ధ‌ర‌లు -15.08 శాతం కాగా, తృణ ధాన్యాలు, ఇత‌ర ఉత్ప‌త్తుల ద్ర‌వ్యోల్బ‌ణం 13.79 శాతంగా న‌మోదైంది. సుగంధ ద్ర‌వ్యాల ధ‌ర‌లు డిసెంబ‌ర్‌లో 20.35 శాతానికి పెరిగాయి. ఫుట్‌వేర్ ధ‌ర‌లు 11.47 శాతం, ఫ్యూయ‌ల్ అండ్ లైట్ ధ‌ర‌లు 10.97 శాతం, పాల ఉత్ప‌త్తుల ధ‌ర‌లు 8.51 శాతంగా న‌మోద‌య్యాయి.

డిసెంబ‌ర్ సీపీఐ అంచ‌నాల కంటే త‌క్కువ‌గా న‌మోదైనా.. కీల‌క వ‌స్తువుల ధ‌ర‌లు ఇంకా పైపైకి దూసుకెళ్తూనే ఉన్నాయ‌ని, కోర్ ద్ర‌వ్యోల్బ‌ణం ఇప్ప‌టికీ సంక్లిష్టంగానే ఉంద‌ని కొట‌క్ మ‌హీంద్రా బ్యాంక్ చీఫ్ ఎక‌న‌మిస్ట్ ఉపాస‌న భ‌ర‌ద్వాజ్ చెప్పారు.