సంస్థాగత బీమాతో లాభాలెన్నో..

ఉద్యోగులకు కంపెనీలు ఇచ్చే హెల్త్‌ ఇన్సూరెన్స్‌ మొదటి రోజు నుంచే వర్తిస్తుంది. అయితే దాని ప్రయోజనాలు తక్షణమే పొందాలంటే మాత్రం కొన్ని ఫార్మాలిటీస్‌ను పూర్తి చేయాల్సి ఉంటుంది. దరఖాస్తులను నింపాల్సి ఉంటుంది. అలా చేయకపోతే క్లయిమ్‌ పెద్ద సమస్య అవుతుంది. ప్రతి పాలసీ తరహాలోనే కంపెనీలు ఉద్యోగులకు ఇచ్చే పాలసీలో కూడా నియమనిబంధనలు, షరతులూ ఉంటాయి. వాటిని మొదట చదివి అర్థం చేసుకోండి.

కుటుంబ ప్రొఫైల్‌ అప్‌డేట్‌
కొత్తగా ఉద్యోగంలో చేరిన తర్వాత మీకు కంపెనీ ఐడెంటిటీ కార్డు వచ్చిన వెంటనే మీ కుటుంబ సభ్యుల వివరాలనూ కంపెనీ ఇన్సూరెన్స్‌ పోర్టల్‌లో అప్‌డేట్‌ చేయండి. ఇలా చేయకపోతే మీతోపాటు కుటుంబ సభ్యులూ ఇన్సూరెన్స్‌ క్లయిమ్‌ను పొందలేరు. హెచ్‌ఆర్‌ మీద ఆధారపడకుండా మీరే మీ కుటుంబ వివరాలను అప్‌డేట్‌ చేయడం మీ బాధ్యత.

ఈ-కార్డ్‌
ఇన్సూరెన్స్‌ పాలసీ జారీ చేసిన వెంటనే థర్డ్‌ పార్టీ అడ్మినిస్ట్రేటర్‌ (టీపీఏ) కార్డులు మీకు మీ కుటుంబ సభ్యుల పేరు మీద జారీ అవుతాయి. అయితే ఈ టీపీఏ కార్డు లేనప్పుడు ఎలక్ట్రానిక్‌ కార్డు (ఈ-కార్డ్‌)ను, ఐడీ కార్డును చూపి దవాఖానలో చేరి క్యాష్‌లెస్‌ సదుపాయాన్ని పొందవచ్చు.

ప్రయోజనాలేమిటో తెలుసుకోండి
క్లయిమ్‌ సందర్భంగా తిరస్కరణ లేదా మరే ఇతర ఇబ్బందులు ఉండకూడదంటే మొదట హెల్త్‌ ఇన్సూరెన్స్‌ పాలసీ డాక్యుమెంట్‌ను పూర్తిగా చదవండి. అందులో ఏయే జబ్బులకు కవరేజీ ఉంది?.. లేదు?.. పరిశీలించండి. కంపెనీలు ఇచ్చే హెల్త్‌ ఇన్సూరెన్స్‌ పాలసీ కొన్ని షరతులతో కూడి ఉంటుంది.

చివరగా..
కంపెనీలు ఇచ్చే హెల్త్‌ ఇన్సూరెన్స్‌ విలువ స్వల్పమే. ఉద్యోగం పోతే ఆ మరుక్షణం పాలసీ రద్దయిపోతుంది. కాబట్టి పర్సనల్‌ హెల్త్‌ ఇన్సూరెన్స్‌ పాలసీ కూడా తీసుకోవడం తప్పనిసరి.