Credit Cards | క్రెడిట్ కార్డులు.. పర్సనల్ లోన్లకు గిరాకీ.. ఇండ్ల రుణాలపై కాస్త తగ్గిన డిమాండ్

Credit Cards | గతంతో పోలిస్తే వస్తువుల కొనుగోళ్లకు క్రెడిట్ కార్డు, పర్సనల్ లోన్లకు గిరాకీ పెరిగింది. మరోవైపు ఇండ్ల రుణాలకు డిమాండ్ తగ్గింది.. కానీ హోంలోన్ల అప్రూవల్ రేట్ మాత్రం 41 శాతం నమోదైంది.

Credit Cards | గతంలో క్రెడిట్ కార్డులు.. పర్సనల్ లోన్స్.. తప్పనిసరి పరిస్థితుల్లో.. ఆల్టర్నేటివ్ లేక ఎమర్జెన్సీగా వినియోగించే ఆప్షన్.. కానీ ఇప్పుడు పరిస్థితి మారింది. ఆదాయం పెరుగుదలతోపాటు వస్తువుల వాడకం కూడా ఎక్కువైంది. కుటుంబ అవసరాలతోపాటు అభిరుచులు, ఆకాంక్షలకు అనుగుణంగా ఖర్చులు పెరిగాయి. వస్తువులను కొనుగోలు చేయడానికి క్రెడిట్ కార్డులు, పర్సనల్ లోన్లకు గిరాకీ పెరిగిందని ట్రాన్స్ యూనియన్ సిబిల్ వెల్లడించింది. గత ఆర్థిక సంవత్సరం డిసెంబర్‌తో ముగిసిన త్రైమాసికంలో పర్సనల్ లోన్ల కోసం ఎంక్వయిరీలు 50 శాతం పెరిగితే, క్రెడిట్ కార్డుల కోసం ఆరా తీసిన వారు 77 శాతం పెరిగారు. ఆస్తులపై రుణాలు 29 శాతం పెరిగాయి. ఇండ్ల కొనుగోళ్లు విలువలో రెండు శాతం, పరిమాణంలో ఆరు శాతం తగ్గుముఖం పట్టింది. అయినా, ఇండ్ల రుణాలకు అప్రూవల్స్ మాత్రం శక్తిమంతంగా 41 శాతం నమోదయ్యాయి. ఫిబ్రవరిలో పర్సనల్ లోన్లు 25.8 శాతం పెరిగితే, క్రెడిట్ కార్డు వాడకం 29.2శాతం ఎక్కువైంది. అయితే 2021తో పోలిస్తే డిసెంబర్ త్రైమాసికంలో కొత్త వర్గాలకు రుణాల అప్రూవల్ రేటు 24 శాతానికి పడిపోయింది.

18 నుంచి 30 ఏండ్ల లోపు కుర్రాళ్లు 2021-22తో పోలిస్తే గత ఆర్థిక సంవత్సరం డిసెంబర్ త్రైమాసికంలో అత్యధికంగా 43 శాతం మంది రుణాలు, క్రెడిట్ కార్డులతో బెనిఫిట్లు, ఫీజుల గురించి ఆరా తీశారు. గ్రామీణ ప్రాంతాల్లోనూ వీటి గురించి ఎంక్వయిరీ చేసే వారు 21 శాతం నుంచి 22 శాతం మంది పెరిగారు. డిసెంబర్ త్రైమాసికంలో టూ వీలర్ రుణాల పరిమాణం, విలువలోనూ గ్రోత్ రికార్డయింది. పరిమాణంలో 23 శాతం, విలువలో 40 శాతం టూ వీలర్ రుణాలు పెరిగాయి.

వడ్డీరేట్లు పెరిగిన నేపథ్యంలో 2022-23 డిసెంబర్ త్రైమాసికంలో ఇండ్ల రుణాల గిరాకీ కూడా ఒకశాతం తగ్గిందని ట్రాన్స్ యూనియన్ సిబిల్ వెల్లడించింది. ఇండ్ల రుణాలకు 2021-22 డిసెంబర్ త్రైమాసికంలో ఏడు శాతం డిమాండ్ ఉంటే.. గత డిసెంబర్ త్రైమాసికంలో ఆరు శాతానికే పరిమితమైంది. అధిక ద్రవ్యోల్బణంతోపాటు వడ్డీరేట్లు పెరిగిపోవడంతో ఇండ్ల కొనుగోలు దారులు అధిక రుణాల విషయంలో సంప్రదాయ విధానానికే ప్రాధాన్యం ఇచ్చారని తెలుస్తున్నది.