Pan-Aadhar Link | హలో మిమ్మల్నే.. ఆధార్‌తో పాన్ కార్డు అనుసంధానం చేసుకున్నారా?.. ఈరోజే లాస్ట్‌

Pan-Aadhar Link | పాన్-ఆధార్ కార్డుల అనుసంధానానికి శుక్రవారంతో గడువు ముగుస్తున్నది. ఈ అర్థరాత్రి దాటితే, లింక్ చేయని పాన్ కార్డు చెల్లుబాటు కాదని ఆదాయం పన్ను విభాగం తేల్చేసింది.

June 30, 2023 / 06:04 PM IST

Pan-Aadhar Link | హలో మిమ్మల్నే.. ఆధార్‌తో పాన్ కార్డు అనుసంధానం చేసుకున్నారా?.. ఈరోజే లాస్ట్‌

Pan-Aadhar Link | ఇప్పుడు బ్యాంకు అకౌంట్ ఓపెన్ చేయాలన్నా.. ఐటీ రిటర్న్స్ ఫైల్ చేయాలన్నా.. జీవిత బీమా పాలసీ తీసుకోవాలన్నా.. పర్మినెంట్ అకౌంట్ నంబర్ (పాన్) తప్పనిసరి. ప్రతి ఒక్కరూ ఆదాయం పన్ను చట్టం-1961 ప్రకారం పాన్ కార్డుతో ఆధార్ అనుసంధానించ వలిసిందే. ఇప్పటి వరకు పాన్-ఆధార్ అనుసంధాన గడువు పలు దఫాలు పొడిగించింది. శుక్రవారం (జూన్ 30)తో గడువు ముగిసిపోనున్నది. జూలై ఒకటో తేదీ లోగా ఆధార్‌తో అనుసంధానించని పాన్ కార్డులు చెల్లుబాటు కావని ఆదాయం పన్ను విభాగం తేల్చి చెప్పింది.

వాస్తవంగా పాన్-ఆధార్ లింక్ గడువు ఎప్పుడో ముగిసిపోయింది. ఇప్పుడు రూ.1000 ఫైన్ చెల్లించి వాటిని అనుసంధానించాల్సి ఉంటుంది. గత మార్చి 31 వరకు, తర్వాత జూన్ 30 వరకు గడువు పొడిగించింది ఆదాయం పన్ను విభాగం. ఇప్పుడు కూడా మరో చాన్స్ ఇవ్వొచ్చునని ఊహాగానాలు వినిపిస్తున్నా.. స్పష్టత రాలేదు. పాన్-ఆధార్ అనుసంధానంతో తమ ఆర్థిక లావాదేవీలు బహిర్గతం అవుతాయన్న భయంతో చాలా మంది వాటిని అనుసంధానించుకోవడానికి ముందుకు రావడం లేదన్న అభిప్రాయాలు వినిపిస్తున్నాయి.

పాన్-ఆధార్ కార్డులను అనుసంధానించామా.. లేదా.. అన్న సందేహాలు ఉంటే వెంటనే ఆదాయం పన్ను వెబ్‌సైట్‌లోకి వెళ్లి ‘లింక్ ఆధార్ స్టేటస్’ మీద క్లిక్ చేస్తే వివరాలు తెలుస్తాయి. ఇప్పటికే లింక్ చేసినట్లు ఉంటే ఆధార్-పాన్ కార్డు అనుసంధానించినట్లు మెసేజ్ వస్తుంది. లేదంటే ఫైన్ చెల్లించి లింక్ చేయడానికి ఆప్షన్లు కనిపిస్తాయి. లింక్ చేసేవారు ఆదాయం పన్ను విభాగం వెబ్ సైట్, ఎన్ఎస్డీఎల్ వైబ్ సైట్ ద్వారా గానీ పే చేయొచ్చు.

ఒకవేళ పాన్-ఆధార్ కార్డులను అనుసంధానించకుంటే బ్యాంకింగ్ సేవలు నిలిచిపోతాయి. డెబిట్, క్రెడిట్ కార్డుల వాడకం, ఆన్ లైన్ పేమెంట్స్, యూపీఐ చెల్లింపులు, మొబైల్ బ్యాంకింగ్ సేవలకు అంతరాయం ఏర్పడుతుంది. వివిధ మార్గాల్లో వచ్చే ఆదాయంపై అధిక మొత్తం పన్ను పే చేయాల్సి ఉంటుంది. పని చేయని పాన్ కార్డుతో ఐటీ రిటర్న్స్ దాఖలు చేయడానికి నిబంధనలు అనుమతించవు.