స్టార్‌ హెల్త్‌ ఐపీవోకు స్పందన కరవు

న్యూఢిల్లీ, డిసెంబర్‌ 2: ప్రైవేట్‌ హెల్త్‌ ఇన్సూరెన్స్‌ సంస్థ స్టార్‌ హెల్త్‌ జారీచేసిన ఇనీషియల్‌ పబ్లిక్‌ ఆఫర్‌కు (ఐపీవో) ఇన్వెస్టర్ల నుంచి సరైన స్పందన లభించలేదు. బిడ్డింగ్‌కు చివరిరోజైన గురువారంనాటికి ఈ ఆఫర్‌ 79 శాతమే సబ్‌స్క్రయిబ్‌ అయ్యింది. ప్రసిద్ద ఇన్వెస్టర్‌ రాకేశ్‌ ఝున్‌ఝున్‌వాలా, అంతర్జాతీయ ఫండ్‌ వెస్ట్‌బ్రిడ్స్‌ క్యాపిటల్‌ వంటి దిగ్గజాల పెట్టుబడులు కలిగిన స్టార్‌ హెల్త్‌ ఐపీవోలో 4.49 కోట్ల షేర్ల ను జారీచేయగా, 3.56 కోట్ల షేర్లకు మాత్రమే దరఖాస్తులు వచ్చినట్లు స్టాక్‌ ఎక్సేంజీల గణాంకాలు వెల్లడిస్తున్నాయి. సెబి నిబంధనల ప్రకారం 75 శాతంలోపు బిడ్స్‌ వస్తే ఐపీవో విఫలమైనట్లుగా పరిగణిస్తారు. ఆ సందర్భంలో ఆఫర్‌ క్యాన్సిల్‌ అవుతుంది. దరఖాస్తు చేసినవారికి డబ్బు తిరిగి చెల్లిస్తారు. అయితే స్టార్‌ హెల్త్‌ 79 శాతం సబ్‌స్క్రిప్షన్లు పొందడం ద్వారా ఆ గండం నుంచి బయటపడింది.