Alibaba | చైనా ఈ-కామర్స్ సంస్థ అలీబాబా ఓ మహిళా ఉద్యోగి, ఆమెకు మద్దతుగా వ్యవహరించిన పది మంది ఇతర ఉద్యోగులకు ఉద్వాసన పలికింది. సదరు మహిళా ఉద్యోగి తనను సహ ఉద్యోగి లైంగిక వేధింపులకు పాల్పడుతున్నారని ఈ ఏడాది ప్రారంభంలో ఆరోపించారు. కానీ నవంబర్ నెలాఖరులో తనను ఉద్యోగం నుంచి తొలగిస్తున్నట్లు పేర్కొంటూ ఆలీబాబా యాజమాన్యం తనకు నోటీస్ అందించిందని చెప్పారు. ఈ ఘటనపై చైనా ప్రభుత్వం మద్దతుతో పని చేస్తున్న దాహే డైలీ శనివారం పొద్దుపోయిన తర్వాత వార్తా కథనం ప్రచురించింది.
ఆమె తనపై సహోద్యోగి లైంగిక వేధింపులకు పాల్పడ్డా.. యాజమాన్యం సరిగ్గా స్పందించలేదని తప్పుడు ప్రచారం చేస్తున్నారని ఆలీబాబా టర్మినేషన్ లెటర్లో పేర్కొంది. ఇది సామాజిక పరమైన సమస్య కావడంతోపాటు కంపెనీకి చెడ్డ పేరు వస్తుందని, అందువల్లే తొలగించామని వెల్లడించింది.
ఆమెకు మద్దతుగా ప్రచారం చేస్తున్న మరో పది మందిని కూడా ఆలీబాబా ఇంటికి సాగనంపింది. కానీ తానే తప్పు చేయలేదని ఆ మహిళ వాదిస్తున్నారు. తన హక్కుల కోసం న్యాయ పోరాటం చేస్తానని చెప్పారు. దీనిపై స్పందించేందుకు ఆలీబాబా అధికార ప్రతినిధి నిరాకరించారు.