ఐసీఐసీఐ బ్యాంక్‌ కొత్త చార్జీలు

ఆగస్టు నుంచి మొదలు
న్యూఢిల్లీ, జూలై 10: లావాదేవీలపై పరిమితుల్ని, చార్జీలను ఐసీఐసీఐ బ్యాంక్‌ సవరించింది. ఆగస్టు 1 నుంచి బ్యాంక్‌ ఖాతాదారులు ఉచిత లావాదేవీల్ని మించి ఏటీఎంల్లో నగదు విత్‌డ్రా చేస్తే మరింత ఎక్కువ చార్జీ చెల్లించాల్సి ఉంటుంది. ఏటీఎంల్లో నగదు విత్‌డ్రాయల్స్‌, చెక్‌బుక్స్‌, ఇతర ఆర్థిక లావాదేవీలకు సంబంధించిన కొత్త మార్పులు.. పొదుపు ఖాతాలతోపాటు సాలరీ ఖాతాలకూ వర్తిస్తాయని బ్యాంక్‌ తెలిపింది.

మార్పులివీ..

1. ఏటీఎం లావాదేవీలు: హైదరాబాద్‌తోసహా ఆరు మెట్రో నగరాల్లో ఉచిత విత్‌డ్రాయల్స్‌ పరిమితి మూడింటికే. ఇదే నాన్‌-మెట్రోల్లో ఐదు విత్‌డ్రాయల్స్‌ ఉచితం. అంతకుమించిన ఒక్కో విత్‌డ్రాయల్‌పై రూ.20 చార్జీ.
2. హోమ్‌ బ్రాంచ్‌లో నగదు లావాదేవీలు: ప్రతీ నెలలోనూ నాలుగు ఉచిత లావాదేవీలకు అనుమతి. ఆపై ఒక్కో లావాదేవీకి రూ.150 చార్జీ. ఈ చార్జీలు విత్‌డ్రాయల్స్‌తోపాటు డిపాజిట్లకూ వర్తిసాయి. నెలలో రూ.లక్షకు మించిన లావాదేవీలపై ప్రతీ రూ.1,000కి రూ.5 చొప్పున చార్జీ విధింపు.
3. చెక్‌ బుక్స్‌: ఒక ఏడాదిలో 25 లీవ్స్‌గల చెక్‌బుక్‌ ఉచితం. అటుపై 10 లీవ్స్‌గల ప్రతీ చెక్‌బుక్‌కూ రూ.20 చార్జీ.