మార్కెట్‌కు ధన్‌తేరాస్‌ కిక్కిచ్చేనా!

ఈసారి ధన్‌తేరాస్‌ (ధనత్రయోదశి) అమ్మకాలు బాగుంటాయన్న ఆశాభావం జ్యుయెల్లర్స్‌లో కనిపిస్తున్నది. ఈ ఏడాది జనవరితో పోల్చితే ప్రస్తుతం ధరలు భారీగా తగ్గడమే ఇందుకు కారణం.

• తగ్గిన ధరలతో జ్యుయెల్లర్స్‌లో అమ్మకాలు పెరుగుతాయన్న ఆశలు

న్యూఢిల్లీ, నవంబర్‌ 5: ఈసారి ధన్‌తేరాస్‌ (ధనత్రయోదశి) అమ్మకాలు బాగుంటాయన్న ఆశాభావం జ్యుయెల్లర్స్‌లో కనిపిస్తున్నది. ఈ ఏడాది జనవరితో పోల్చితే ప్రస్తుతం ధరలు భారీగా తగ్గడమే ఇందుకు కారణం. దీంతో శుక్రవారం బంగారం, వెండి అమ్మకాల విలువ 20-30 శాతం పెరుగుతుందని నగల వ్యాపారులు అంచనా వేస్తున్నారు.

అయినప్పటికీ వాల్యూమ్‌ పరంగా బంగారం అమ్మకాలు గత ఏడాది స్థాయిలోనే ఉండే అవకాశం ఉన్నదంటున్నారు. వినియోగదారులు తేలికపాటి నగలు, తక్కువ ధర కొనుగోళ్లకే మొగ్గుచూపుతున్నారని వ్యాపారులు చెప్తున్నారు మరి. హిందూ సంప్రదాయంలో బంగారం, వెండి తదితర విలువైన లోహాలు కొనడానికి ధన్‌తేరాస్‌ను అత్యంత శుభదినంగా భావిస్తారన్న విషయం తెలిసిందే.

మళ్లీ పెరిగిన ధరలు

ఢిల్లీలో గురువారం 24 క్యారెట్‌ (99.9 స్వచ్ఛత) 10 గ్రాముల బంగారం ధర రూ.2,200 పెరిగింది. దీంతో పన్నులతో కలిపి రూ.1,48,800కు చేరింది. అయితే ఈ ఏడాది జనవరి 29న నమోదైన రికార్డు రూ.1,83,000తో పోలిస్తే ఇది 19 శాతం తక్కువ. అయినప్పటికీ గత ఏడాది అక్టోబర్‌ 18న ధన్‌తేరాస్‌ సందర్భంగా నమోదైన రూ.1,32,400 కంటే ప్రస్తుత ధర ఎక్కువగానే ఉన్నది. ఇక కిలో వెండి ధర రూ.1,500 పెరిగి రూ.1,94,500కు చేరింది.

జనవరి 29న మునుపెన్నడూ లేనివిధంగా రూ.4,04,500 పలికిన సంగతి విదితమే. దీంతో 52 శాతం తగ్గింది. కానీ 2025 ధన్‌తేరాస్‌ నాటి రేటు రూ.1,70,000 కంటే ఇప్పుడు ఎక్కువగానే ఉన్నది. ఇక హైదరాబాద్‌ విషయానికొస్తే.. 22 క్యారెట్‌ (99.5 స్వచ్ఛత) తులం రేటు రూ.1,33,850గా ఉన్నది. బుధవారంతో చూస్తే రూ.2,950 ఎగిసింది. అంతర్జాతీయంగా ఔన్స్‌ గోల్డ్‌ 65.12 డాలర్లు పెరిగి 4,125.25 డాలర్లుగా నమోదైంది. సిల్వర్‌ కూడా 52.73 డాలర్లకు పెరిగింది.