iPhone 15 | ఐ-ఫోన్ ప్రియులకు షాక్.. ఐ-ఫోన్ 15 లాంచింగ్ ఆలస్యం.. కారణం అదేనా..?!

iPhone 15 | ఈ ఏడాది ఆపిల్ ఐ-ఫోన్ 15 మార్కెట్లో ఆవిష్కరణ నెలరోజులు జాప్యం అవుతుందని తెలుస్తున్నది. దీనికి సాంకేతిక అంశాలే కారణమని సమాచారం.

iPhone 15 | ప్రతి ఏడాది మాదిరిగానే ఆపిల్ ఈ ఏడాది మార్కెట్లో విడుదల చేసే ‘ఐ-ఫోన్ 15’ ఒక నెల రోజులు ఆలస్యంగా వస్తు్న్నట్లు తెలుస్తున్నది. ఐ-ఫోన్ల విడుదలకు ముందే మార్కెట్లో ఓ ట్రెండ్ క్రియేట్ అవుతూ ఉంటుంది. లేటెస్ట్ ఫోన్ కోసం ఫోన్ ప్రియులు ఎదురు చూస్తూ ఉంటారు. వాస్తవంగా ప్రతియేటా సెప్టెంబర్‌లో ఐ-ఫోన్ విడుదల చేసి, తర్వాత కొన్ని రోజులకు సేల్స్ ప్రారంభిస్తుంది ఆపిల్. ఇంతకుముందు కూడా కొవిడ్-19 వల్ల 2020లో మార్కెట్లో ఆలస్యంగా ఐ-ఫోన్ 12 ఆవిష్కరించారు. వివిధ మ్యాగజైన్లు, వెబ్ సైట్లలో వచ్చిన వార్తల ప్రకారం వచ్చే అక్టోబర్‌లో ఐ-ఫోన్ 15 సిరీస్ ఫోన్లు ఆవిష్కరిస్తుంది. దీనికి స్క్రీన్ మాన్యుఫాక్చరింగ్ అంశాలే కారణమని తెలుస్తున్నది.

సెప్టెంబర్‌లో ఐ-ఫోన్ విడుదల చేసే సమయానికి ఐ-ఫోన్ 15 ప్రో, ఐ-ఫోన్ 15 ప్రో మ్యాక్స్ ఫోన్లు తగినంత అందుబాటులో ఉండనందునే లాంచింగ్ ఆలస్యం అవుతున్నట్లు సమాచారం. ఆపిల్ ఐ-ఫోన్ ప్రో మోడల్స్‌లో వినియోగించే డిస్ ప్లే తయారీ సంస్థలు కొత్త మాన్యుఫాక్చరింగ్ ప్రక్రియ అనుసరించడం, డిస్ ప్లే టెస్టింగ్‌లో ఎల్జీ సంస్థకు అంతరాయం ఏర్పడటమే ఆలస్యానికి కారణమని తెలుస్తున్నది. కొవిడ్-19 మహమ్మారి వేళ కూడా ఐ-ఫోన్ 12 సిరీస్ ఫోన్ల విడుదలకు ఇటువంటి అంతరాయమే ఏర్పడింది. ఈ దఫా ఆపిల్.. ఐ-ఫోన్ 15, ఐ-ఫోన్ 15 ప్లస్, ఐ-ఫోన్ 15 ప్రో, ఐ-ఫోన్ 15 ప్రో మ్యాక్స్ ఫోన్లను మార్కెట్లోకి తెస్తున్నట్లు సమాచారం.